ოთხშაბათს გაეროს გენერალურმა ასამბლეამ მოიწონა რეზოლუცია, რომელიც შეიცავს ისრაელის მიმართ მოთხოვნას, 12 თვის განმავლობაში შეწყვიტოს თავისი „ყოფნა“, როგორც ტექსტშია ნათქვამი, ოკუპირებულ პალესტინურ ტერიტორიებზე. რეზოლუციის ტექსტი, რომელიც, გაეროს უშიშროების საბჭოს რეზოლუციებისგან განსხვავებით, არ ატარებს სავალდებულო ხასიათს, ემყარება გაეროს საერთაშორისო სასამართლოს საკონსულტაციო დასკვნას, რომელიც ადრე იქნა მიღებული და რომელშიც 1967 წელს ისრაელის მიერ პალესტინური ტერიტორიების ოკუპაცია „უკანონოდ“ არის მიჩნეული. ისრაელმა კატეგორიულად უარყო რეზოლუცია და განაცხადა, რომ ის მხოლოდ ხელს შეუწყობს ახლო აღმოსავლეთში ძალადობის ესკალაციას. დოკუმენტს მხარი დაუჭირა გაეროს 124-მა წევრმა ქვეყანამ, წინააღმდეგი იყო 14, 43-მა თავი შეიკავა. რეზოლუციის წინააღმდეგ გამოვიდა აშშ. აშშ-ის ელჩმა გაეროში ლინდა ტომას-გრინფილდმა აღნიშნა, რომ შემოთავაზებული ტექსტი არ აახლოებს მშვიდობას ახლო აღმოსავლეთში და თქვა, რომ ის არ შეიცავს დაჯგუფება ჰამასის მოქმედების დაგმობას, რითაც დაიწყო 7 ოქტომბერს ამჟამად ღაზის სექტორში მიმდინარე ომი. რეზოლუციის პროექტი გაეროში პირველად წარადგინა პალესტინის სახელმწიფოს დელეგაციამ. მას დამკვირვებლის სტატუსი აქვს, მაგრამ მაისში გაეროში პალესტინის დელეგაციის უფლებამოსილებები გაფართოვდა. რეზოლუცია ოფიციალურად შეიტანა 40-მა სახელმწიფომ. გაეროს გენერალურმა ასამბლეამ შარშან არაერთხელ მიიღო რეზოლუციები, რომლებიც შეიცავს ისრაელისადმი მოთხოვნას, შეწყვიტოს ტერიტორიების ოკუპაცია, რომლებზეც 1967 წელს დაამყარა კონტროლი. საქმე ეხება მდინარე იორდანეს დასავლეთ ნაპირს, ღაზის სექტორსა და აღმოსავლეთ იერუსალიმს. ასევე ნახეთ გაეროს გენერალური ასამბლეა კენჭს უყრის რეზოლუციას, რომელიც მოითხოვს ღაზაში ომის დასრულებას ასევე ოთხშაბათს, როგორც Reuters-ი იტყობინება, საუდის არაბეთის ტახტის მემკვიდრე პრინცმა მოჰამედ ბინ სალმანმა განაცხადა, რომ ელ-რიადი ისრაელს დე იურე არ აღიარებს და მასთან დიპლომატიურ ურთიერთობებს მანამდე არ მოაგვარებს, სანამ არ შეიქმნება პალესტინის სახელმწიფო, რომელსაც ისრაელი ცნობს. ამასთან, წყაროების შეფასებით, საუდის არაბეთი და ისრაელი შარშან ახლოს იყვნენ ურთიერთობების ნორმალიზების შესახებ შეთანხმების მიღწევასთან. მოლაპარაკებები აშშ-ის შუამავლობით მიმდინარეობდა. მაგრამ ღაზაში ომის დაწყებამ შეუძლებელი გახადა მიმდინარე პერიოდში ხელშეკრულების ხელმოწერა. ...