რუსეთის პრეზიდენტმა ვლადიმირ პუტინმა მოიწონა რუსეთის საგარეო საქმეთა სამინისტროს წინადადება ირანთან ყოვლისმომცველი სტრატეგიული პარტნიორობის ხელშეკრულების ხელმოწერის შესახებ. რუსეთის პრეზიდენტის შესაბამისი ბრძანება ოთხშაბათს გამოქვეყნდა. ნათქვამია, რომ პუტინი მიზანშეწონილად მიიჩნევს ასეთი შეთანხმების ხელმოწერას უმაღლეს დონეზე. თუმცა, შეთანხმების პროექტის ტექსტი არ გამოქვეყნებულა. ზუსტად იმავე ფორმულირებით - ოღონდ ირანის ნაცვლად კორეის სახალხო-დემოკრატიული რესპუბლიკის ხსენებით - ბრძანება გამოქვეყნდა ვლადიმირ პუტინის ფხენიანში ბოლო ვიზიტის წინ. ამ ვიზიტის დროს პუტინმა და ჩრდილოეთ კორეის ლიდერმა კიმ ჩენ ინმა ხელი მოაწერეს შეთანხმებას ორ ქვეყანას შორის ყოვლისმომცველი სტრატეგიული პარტნიორობის შესახებ, რომელიც, სხვა საკითხებთან ერთად, ითვალისწინებს თავდასხმის შემთხვევაში დახმარების გაწევის ვალდებულებას, მათ შორის შეიარაღებულ დახმარებას, თუკი ხელშეკრულების მონაწილე ერთ-ერთ მხარეს თავს დაესხმება მესამე ქვეყანა. ანუ მოსკოვმა და ფხენიანმა არსებითად შექმნეს სამხედრო ალიანსი. ამავე დროს, პუტინი ამტკიცებდა, რომ ჩრდილოეთკორეელი ჯარისკაცები უკრაინასთან ომში არ წავიდოდნენ. უცნობია, შეიცავს თუ არა ირანთან შეთანხმება სამხედრო დახმარების მსგავს პუნქტს. ირანი მტრულ ურთიერთობაშია ისრაელთან, მხარს უჭერს ებრაული სახელმწიფოს წინააღმდეგ მებრძოლ სხვადასხვა შეიარაღებულ დაჯგუფებებს. ასევე ნახეთ პეიჯერებით თავდასხმა - ესკალაციის ახალი ფაზა ჰეზბოლასა და ისრაელს შორის ივნისში რუსეთის საგარეო საქმეთა მინისტრის მოადგილემ ანდრეი რუდენკომ განაცხადა, რომ რუსეთისა და ირანის დელეგაციებმა 21 ივნისს მოსკოვში გამართულ კონსულტაციებზე მოახერხეს ხელშეკრულების პროექტის საბოლოო ტექსტის შეთანხმება. მაშინ მისი ხელმოწერის თარიღი არ იყო ნახსენები. ოთხშაბათს ირანულმა სააგენტო Tasnim-მა გაავრცელა ინფორმაცია, რომ შეთანხმება შესაძლოა ოქტომბერში გაფორმდეს ირანის პრეზიდენტ მასუდ ფეზეშქიანის რუსეთში ვიზიტის დროს. ...