მოკლული კესარია აბრამიძის მეგობარი, მისი ყოფილი პროდიუსერი იაკობ მამულია, რომელიც ამერიკაში ცხოვრობს, რადიო თავისუფლებას უყვება, რომ კესოს ბოლოს ორი დღის წინ ელაპარაკა. დროში სხვაობის გამო ხანგრძლივი საუბარი ვერ მოასწრეს, თუმცა იაკობ მამულია ამბობს, რომ რამდენიმე დღის წინ შეიტყო, რომ კესომ ურთიერთობა აღადგინა პარტნიორთან, რომელთანაც ძალადობისა და მუქარის გამო დაშორებული იყო. „ვიცი, რომ [მკვლელობაში ბრალდებულმა] კესოს გაცნობიდან რამდენიმე თვეში დაიწყო ეჭვიანობა. ჩვენ, მისი ყველა მეგობარი, ამ ურთიერთობის წინააღმდეგი ვიყავით, როცა გამოვლინდა, რომ იყო ეჭვიანი მოძალადე. გაზაფხულზე ვნახეთ, რომ ეს ადამიანი დემონსტრანტების ცემაში მონაწილეობდა („აგენტების კანონის“ საწინააღმდეგო აქციები თბილისში აპრილ-მაისში მიმდინარეობდა - რ.თ.) ამ ფაქტის მერე კესო ძალიან გაერიდა, არ უნდოდა გაეგოთ, რომ ასეთ მოძალადე ადამიანთან ჰქონდა ურთიერთობა. გარკვეული პერიოდი თურქეთში იყო წასული, იქაც ემუქრებოდა. რომ ჩამოვიდა, სახლში რამდენჯერმე მიუვარდა. თვითონ კესო არ იყო სახლში და მეზობლებმა დაინახეს, როგორ ანგრევდა კარს. არ ვიცი როგორ დაემართა, ასეთი გამოცდილი იყო, თავსაც იცავდა. თვითონ კი ასე ფუთავდა, რომ ეს იყო ტოქსიკური ურთიერთობა, მაგრამ ალბათ ტოქსიკურზე მეტი იყო, ბოლო ფაქტი რომ მომიყვა. მაგის მერე პარასკევს ვესაუბრე და მაშინ მითხრა, დავასრულე ურთიერთობაო. მერე გუშინწინ (17 სექტემბერს) ისევ მისულა სახლში და მე რომ გავიგე ეს ამბავი, შევედი მის გვერდზე და ვნახე ეს დადებული სტორი, მივხვდი, რომ ისევ ერთად იყვნენ“, - ამბობს იაკობ მამულია. ის გულისხმობს კესარია აბრამიძის სოციალურ ქსელში გამოქვეყნებულ ფოტოს, რომელშიც ის, სავარაუდოდ, მკვლელობაში ბრალდებულთან ერთად ჩანს. იაკობ მამულია რადიო თავისუფლებას ეუბნება, რომ რამდენადაც მისთვისაა ცნობილი, კესარია თავის მიმართ მუქარისა და ძალადობის შესახებ პოლიციას არ ატყობინებდა „შიშის გამო“. შსს-ში რადიო თავისუფლებას უდასტურებენ, რომ უწყებისთვის კესარია აბრამიძეს არ მიუმართავს. „ის [კესარია] არის, ცალსახად, ქვეყანაში ძალადობის წახალისების მსხვერპლი“, - ამბობს მოკლული კესარია აბრამიძის მეგობარი. მისი თქმით, გამომძიებლები მას ჯერჯერობით არ დაჰკავშირებიან. გამოძიების ინფორმაციით, 26 წლის კაცმა ტრანსგენდერი ქალი მის სახლში გენდერის ნიშნით განსაკუთრებული სისასტიკით მოკლა. ქალს ჭრილობები დანით აქვს მიყენებული. კესარია აბრამიძე 18 სექტემბერს გარდაიცვალა. თავდაპირველად გამოძიება დაიწყო განზრახ მკვლელობის მუხლით (სისხლის სამართლის კოდექსის 108-ე მუხლით), მოგვიანებით კი კვალიფიკაცია დამძიმდა. შსს-ს ცნობით, გამოძიება გრძელდება სისხლის სამართლის კოდექსის 109-ე მუხლის „თ“ და „მ“ პუნქტებით - გენდერის ნიშნით განსაკუთრებული სისასტიკით დამამძიმებელ გარემოებაში ჩადენილი...