მოსკოვი და კიევი წინააღმდეგობრივ ინფორმაციას ავრცელებენ ვითარებაზე რუსეთის დასავლეთში მდებარე კურსკის ოლქში. რუსეთი აცხადებს, რომ წარმატებას მიაღწია იმ ტერიტორიების დაბრუნებაში, რომლებიც უკრაინის შეიარაღებულმა ძალებმა ჩაიგდეს ხელთ. უკრაინა ამბობს, რომ რუსეთის ჯარების კონტრიერიში შეჩერებულია. რუსეთის შეიარაღებული ძალების გენერალ-მაიორმა აპტი ალაუდინოვმა, ჩეჩნური სპეცდანიშნულების რაზმ „ახმატის“ მეთაურმა, რომელსაც მაღალი თანამდებობა უჭირავს რუსეთის თავდაცვის სამინისტროში, 19 სექტემბერს განაცხადა, რომ რუსეთის ჯარებმა კურსკის ოლქში ორი სოფელი დაიბრუნეს. ასევე ნახეთ ინტერაქტიური რუკა: უკრაინის ჯარების შესვლა კურსკის ოლქში უკრაინის შეიარაღებული ძალების წარმომადგენელმა ოლექსი დმიტრაშკივსკიმ კი AFP-ს უთხრა, რომ კურსკის ოლქში რუსეთის ჯარების მანევრი „შეჩერებულია“. „მდგომარეობა სტაბილიზებულია და დღეს ყველაფერი კონტროლს ექვემდებარება, მათ წარმატებას ვერ მიაწიეს,“ თქვა დმიტრაშკივსკიმ 19 სექტემბერს. განვლილი კვირების განმავლობაში რუსეთი ამტკიცებდა, რომ დაიბრუნა რამდენიმე სოფელი, რომლებიც უკრაინის ჯარებმა ჩაიგდეს ხელში, მას მერე, რაც აგვისტოს დამდეგს მოულოდნელად შეიჭრნენ კურსკის ტერიტორიაზე. სამხედრო ექსპერტების ვარაუდით, ყველაზე წარმატებულ პერიოდში უკრაინის ჯარები 1300 კვადრატულ კილომეტრ ტერიტორიას აკონტროლებდნენ კურსკის ოლქში, რომელიც უკრაინას ესაზღვრება. ...