„გახარია საქართველოსთვის“ განცხადებით, ამ ეტაპზე ვერ შედგა შეთანხმება პარტიასთან, „ძლიერი საქართველო-ლელო, ხალხისთვის, თავისუფლებისთვის!“ განცხადებაში, რომელიც საქართველოს ყოფილი პრემიერ-მინისტრის პარტიამ გაავრცელა, ვკითხულობთ, რომ, როგორც ჩანს, მეორე მხარემ შიდა კონსენსუსს ვერ მიაღწია. პარტია მადლობას უხდის „ლელოს“ და პრეზიდენტ სალომე ზურაბიშვილს და აცხადებს, რომ ამ ეტაპზე შეთანხმება ვერ შედგა. „ჩვენი პოლიტიკური გუნდისთვის სახელმწიფოსა და ჩვენი მოქალაქეების საერთო ეროვნული ინტერესები ყოველთვის იდგა უფრო მაღლა, ვიდრე რაიმე სახის პარტიული ან/და პერსონალური ინტერესი. ასე იყო წარსულში - ჩვენი ხელისუფლებაში ყოფნის დროს, ასეა დღეს - ოპოზიციაში, ასე იქნება მომავალში. აქედან გამომდინარე, ჩვენ გვერდზე გადავდეთ ჩვენი პარტიული ინტერესები და ყველაფერი დავთმეთ, სანაცვლოდ მეორე მხარემ ითხოვა ვადა შიდა კოალიციური შეთანხმებისთვის. ჩვენდა სამწუხაროდ, როგორც ჩანს, მეორე მხარემ შიდა კონსენსუსს ვერ მიაღწია. საარჩევნო დრო კონკრეტული გადაწყვეტილებების მისაღებად უკვე შეზღუდულია, შესაბამისად, ამ ეტაპზე შეთანხმების მიღწევა ვერ მოხერხდა“, - წერია „გახარია საქართველოსთვის“ განცხადებაში. გახარიას პარტია იმედს გამოთქვამს, რომ „ლელოსთან“ მომდევნო მოწვევის პარლამენტში ითანამშრომლებს. „ჩვენსა და “ლელოს” შორის დაწყებული დისკუსია გვიჩენს პოზიტიურ მოლოდინებს, მომდევნო მოწვევის პარლამენტში თანამშრომლობასთან დაკავშირებით. ჩვენი პოლიტიკური მიზანია „ოცნების“ ხელისუფლებიდან გაშვება „ნაციონალური მოძრაობის“ დაბრუნების გარეშე, ქვეყანაში მშვიდობის უზრუნველყოფა და პოლარიზაციის დასრულება“, - აღნიშნულია განცხადებაში. ასევე ნახეთ გახდა თუ არა პარიტეტზე შეუთანხმებლობა გახარიასთან მოლაპარაკების ჩაშლის მიზეზი? - ხაზარაძის პასუხი პარტია „ძლიერი საქართველო-ლელო, ხალხისთვის, თავისუფლებისთვის!“ ლიდერმა მამუკა ხაზარაძემ, გიორგი გახარიას პარტიის მიერ გამოქვეყნებული განცხადების შემდეგ ჟურნალისტებთან ილაპარაკა ბოლო დღეებში გამართული მოლაპარაკებების შესახებ. შეკითხვაზე, პარიტეტზე შეუთანხმებლობა გახდა თუ არა მთავარი მიზეზი, რის გამოც ორ პარტიას შორის შეთანხმება ვერ შედგა, ხაზარაძემ უპასუხა, რომ ამ საკითხზე კონკრეტულად გახარიასა და ყოფილ „ლელოს“ შორის შეთანხმება არის, თუმცა მან დამატებით ფაქტორად დაასახელა „ლელოსთან“ გაერთიანებული სხვა პოლიტიკოსები. 18 სექტემბერს მამუკა ხაზარაძემ ჟურნალისტებთან თქვა, რომ გიორგი გახარიას მათთან „თანაბარ, სწორუფლებიან პარტნიორად“ შესვლა შესთავაზა. „ვის რა ზომა, წონა აქვს ამ კოალიციაში, ეს არ არის მთავარი“, - დააზუსტა მან. ამ დროისთვის ცნობილია, რომ „ლელოს“ საარჩევნო ნომრით და სიით არჩევნებში მონაწილეობას ასევე მიიღებენ ალეკო ელისაშვილის, ანა დოლიძისა და ლევან ცუცქი...