„თავიდან ჩემი ინიციატივა იყო, ყველა გავერთიანებულიყავით. ნუ, რადგან ეს არ გამოდის, მე კიდევ ერთხელ ვუბრუნდები ინიციატივას „ახლების“ მიმართ, რომ ჩვენ მაინც გავერთიანდეთ... „ნაციონალური მოძრაობა“ ამ არჩევნებში ყველა ვარიანტში პირველ ადგილზე გავა, ეჭვი არ მეპარება“, - თქვა მიხეილ სააკაშვილმა სასამართლო სხდომაზე. პარტია „ახალზე“ საუბარი მან დაიწყო „ლელოსა“ და „საქართველოსთვის“ შორის მიმდინარე მოლაპარაკებების საკითხით. სასამართლო სხდომის გახსნიდან რამდენიმე წუთში გახდა ცნობილი, რომ "ლელომ" და ყოფილი პრემიერ-მინისტრის, გიორგი გახარიას პარტიამ საარჩევნოდ გაერთიანებაზე შეთანხმებას ვერ მიაღწიეს. თუმცა მიხეილ სააკაშვილი ამის შესახებ, სავარაუდოდ, ინფორმირებული არ იყო: „მე მივესალმები ორი სუბიექტის გაერთიანებას, „ლელოსი“ და გახარიასი. მივესალმები, მიუხედავად ბევრი კითხვისა, იმიტომ რომ, რა თქმა უნდა, ეს არის სწორი მიმართულებით გადადგმული ნაბიჯი“, - თქვა მან. ასევე ნახეთ „გახარია საქართველოსთვის“: ამ ეტაპზე შეთანხმების მიღწევა ვერ მოხერხდა რადიო თავისუფლება დაუკავშირდა პარტია „ახალს“, მათგან პასუხის მიღების შემთხვევაში, ტექსტი განახლდება. პარტია „ახალი“ „ნაციონალური მოძრაობის“ ყოფილმა თავმჯდომარემ ნიკა მელიამ და „მთავარი არხის“ ყოფილმა გენერალურმა დირექტორმა ნიკა გვარამიამ პატიმრობიდან გათავისუფლების შემდეგ დააფუძნეს. მომავალი საპარლამენტო არჩევნებისთვის პარტიამ შექმნა „კოალიცია ცვლილებისთვის“, რომელშიც მასთან ერთად გაერთიანებული არიან „დროა“, „გირჩი - მეტი თავისუფლება“ და „რესპუბლიკური პარტიის“ წევრი ხათუნა სამნიძე. ...