პარტიის, „ძლიერი საქართველო: ლელო, ხალხისთვის, თავისუფლებისთვის!“ ლიდერმა მამუკა ხაზარაძემ გიორგი გახარიას პარტიის მიერ გამოქვეყნებული განცხადების შემდეგ ჟურნალისტებთან ილაპარაკა ბოლო დღეებში გამართული მოლაპარაკებების შესახებ. შეკითხვაზე, პარიტეტზე შეუთანხმებლობა გახდა თუ არა მთავარი მიზეზი, რის გამოც ორ პარტიას შორის შეთანხმება ვერ შედგა, ხაზარაძემ უპასუხა, რომ ამ საკითხზე კონკრეტულად გახარიასა და ყოფილ „ლელოს“ შორის შეთანხმება არის, თუმცა მან დამატებით ფაქტორად დაასახელა „ლელოსთან“ გაერთიანებული სხვა პოლიტიკოსები. „მე პატივს ვცემ კოალიციის იმ წევრებს, რომლებიც ჩვენთან არიან, ზომის და წონის მიუხედავად. ვის უფრო მეტი ხალხის რაოდენობა ჰყავს და ა.შ. [ასე] არ ვუყურებ მე პარტნიორობას. პარიტეტი ყოფილ „ლელოსა“ და გახარიას პარტიას შორის არის, ამაზე ჩვენ შევთანხმდით... ასევე, როგორც ცალკე სუბიექტები, ის სამი ადამიანი [ალეკო ელისაშვილი, ანა დოლიძე და ლევან ცუცქირიძე], რომლებიც შემოვიდნენ კოალიციაში და ჩვენ ამის გამო სახელიც კი შევცვალეთ და დავარქვით „ძლიერი საქართველო“, ეს აღარ არის „ლელო“, ისინიც [გახარიას პარტიის წევრები] უნდა ყოფილიყვნენ გათვალისწინებული, როგორც დამატებითი ამ კოალიციის დიდი ჯგუფის ნაწილი. მეტი დეტალი აღარ არის საჭირო“, - უთხრა ჟურნალისტებს მამუკა ხაზარაძემ. „გახარია საქართველოსთვის“ განცხადებით, ამ ეტაპზე ვერ შედგა შეთანხმება პარტიასთან „ძლიერი საქართველო-ლელო, ხალხისთვის, თავისუფლებისთვის!“ განცხადებაში, რომელიც საქართველოს ყოფილი პრემიერ-მინისტრის პარტიამ გაავრცელა, ვკითხულობთ, რომ, როგორც ჩანს, მეორე მხარემ შიდა კონსენსუსს ვერ მიაღწია. ასევე ნახეთ „გახარია საქართველოსთვის“: ამ ეტაპზე შეთანხმების მიღწევა ვერ მოხერხდა 18 სექტემბერს მამუკა ხაზარაძემ ჟურნალისტებთან თქვა, რომ გიორგი გახარიას მათთან „თანაბარ, სწორუფლებიან პარტნიორად“ შესვლა შესთავაზა. „ვის რა ზომა, წონა აქვს ამ კოალიციაში, ეს არ არის მთავარი“, - დააზუსტა მან. ამ დროისთვის ცნობილია, რომ „ლელოს“ საარჩევნო ნომრით და სიით არჩევნებში მონაწილეობას ასევე მიიღებენ ალეკო ელისაშვილის, ანა დოლიძისა და ლევან ცუცქირიძის პოლიტიკური გუნდები. „ჩვენ ოთხი პარტია ვართ გაერთიანებული, ოთხი პოლიტიკური სუბიექტი და ისინი [„გახარია საქართველოსთვის“] გახდნენ ჩვენი კოალიციის წევრები, ძალიან მკაფიო შეთავაზებაა“, - თქვა ალეკო ელისაშვილმა 18 სექტემბერს „TV პირველის“ ეთერში. გიორგი გახარიამ კი ამავე დღეს, ხაზარაძესთან შეხვედრის შემდეგ, ტელეკომპანია „ფორმულის“ ეთერში განაცხადა, რომ მოლაპარაკება მიდის ორ პოლიტიკურ სუბიექტს [„გახარია საქართველოსთვის“ და „ძლიერი საქართველო-ლელო, ხალხისთვის, თავისუფლებისთვის!“] შორის. „დღეს ჩვენ ვსაუბრობთ ორ საარჩევნო სუბიექტზე, ორ ნომერზე - ეს არის 9 ნომერი ...