დღეს დილით კიევში ჩავიდა ევროკომისიის პრეზიდენტი ურზულა ფონ დერ ლაიენი, რომელიც უკრაინის პრეზიდენტ ვოლოდიმირ ზელენსკის და მთავრობის მაღალჩინოსნებს შეხვდება. უკრაინის დედაქალაქში ჩასულმა ფონ დერ ლაიენმა სოციალურ ქსელ X-ში, ოფიციალურ გვერდზე დაწერა, რომ კიევში მისი მერვე ვიზიტი ემთხვევა პერიოდს, როცა მალე გათბობის სეზონი იწყება, რუსეთი კი უკრაინის ენერგეტიკის ინფრასტრუქტურაზე დარტყმებს განაგრძობს. ევროკომისიის პრეზიდენტის თანახმად, კიევში ჩავიდა ზამთრისთვის მომზადების, თავდაცვის და ფინანსური დახმარების საკითხებში ევროპის მხარდაჭერის განსახილველად. три კიევში ვიზიტის წინ, 19 სექტემბერს ფონ დერ ლაიენმა განაცხადა, რომ ევროკავშირი 160 მილიონი ევროთი დააფინანსებს ზამთრისთვის უკრაინის ენერგოსისტემის მომზადებას. ენერგეტიკის საერთაშორისო სააგენტოს შეფასებით, მოახლოებული ზამთარი, ომის დაწყების შემდეგ, უკრაინის ენერგოსისტემისთვის ყველაზე მძიმე გამოცდა იქნება, რადგან ენერგოობიექტებზე რუსეთის მუდმივი შეტევების გამო უკრაინის ენერგეტიკა კოლაფსის ზღვარზეა. უკრაინის ენერგოობიექტების მიზანმიმართულად განადგურების გამო, 2024 წლის 5 მარტს, სისხლის სამართლის საერთაშორისო სასამართლომ გასცა რუსეთის შავი ზღვის ფლოტის სარდლის, ადმირალ ვიქტორ სოკოლოვის და საჰაერო-კოსმოსური ძალების შორეული ავიაციის სარდლის, გენერალ-ლეიტენანტ სერგეი კობილაშის დაპატიმრების ორდერები. სოკოლოვი და კობილაში ეჭვმიტანილი არიან ომის დანაშაულში, კერძოდ, მათი ხელმძღვანელობით მოქმედი ძალების მიერ უკრაინის ენერგოობიექტების განზრახ განადგურებაში, რამაც მნიშვნელოვანი ზიანი მიაყენა მშვიდობიან მოსახლეობას. რუსი ადმირალი და გენერალი ეჭვმიტანილი არიან ანტიჰუმანური ქმედებებით კაცობრიობის წინააღმდეგ დანაშაულის ჩადენაშიც. ...