კოალიცია "ძლიერი საქართველოს" ერთ-ერთი ლიდერი მამუკა ხაზარაძე, რომელიც მოლაპარაკებას აწარმოებდა პარტიის, „საქართველოსთვის“ თავმჯდომარე გიორგი გახარიასთან, ამბობს, რომ შეუძლებელია მის მიერ დღეს, 20 სექტემბერს, წარმოდგენილი პირობების შესრულება. გახარიამ თქვა, რომ მზადაა, საპარლამენტო არჩევნებისთვის „ლელოსთან“ საერთო შეთანხმებას მოაწეროს ხელი, თუ მამუკა ხაზარაძის პარტია მის სამ პირობას დასთანხმდება. (ნეიტრალური პლატფორმა, პარიტეტული პრინციპი და პრინციპი, რომ ამ არჩევნების შემდეგ არ შედგება კოალიცია არც „ქართულ ოცნებასთან“ და არც „ნაციონალურ მოძრაობასთან“.) "დღეს გახარიამ თქვა, რომ წერტილი დაესვა მოლაპარაკებას. მან თქვა აბსოლუტურად ახალი პირობები, რომელიც ტექნიკურ-სამართლებრივად და უამრავი სხვა პირობების გათვალისწინებით, შეუძლებელია. ეს ნიშნავს, რომ ჩვენი პარტია, კოალიცია და გაერთიანება უნდა ჩამოშორდეს კამპანიას. იმიტომ რომ, მოგეხსენებათ, შეუძლებელია რაიმე კამპანიის, რაიმე ნომრის, რაიმე სიის და ტექნიკურ საშუალებების მომზადება, მისი განთავსება და სხვა", - თქვა მამუკა ხაზარაძემ პარტიის ოფისში გამართულ პრესკონფერენციაზე. მისი სიტყვებით, კოალიცია „ძლიერი საქართველო” დღესაც მზადაა, ხელი მოაწეროს პრეზიდენტთან 18 სექტემბერს მიღწეულ ცხრაპუნქტიან შეთანხმებას. ასევე ნახეთ გახარია მზადაა, ხაზარაძესთან შეთანხმებას ხელი მოაწეროს სამი პირობის შესრულების შემთხვევაში "ზუსტად ცხრა პუნქტი იქნა ჩამოყალიბებული და ინტენსიური მოლაპარაკების შედეგად გუშინწინ ჩვენ ამ პუნქტებზე შევთანხმდით, პრაგმატული მოსაზრებებიდან გამომდინარე და არა სხვა რაღაც მოსაზრებებიდან გამომდინარე... დავეთანხმეთ ჩვენ, რომ აგვეღო ბაზად ნომერი ცხრა, შევთანხმდით, რომ ყოფილიყო პარიტეტული მმართველობა, თანასწორუფლებიანი წარმომადგენლობა სიაში, პირველი ადგილი დაგვეთმო ცნობილი, არაპარტიული ადამიანისთვის", - თქვა მამუკა ხაზარაძემ. მისი განმარტებით, 18 სექტემბერს პრეზიდენტის სასახლე დატოვეს შეგრძნებით, რომ "გუშინ [19 სექტემბერს] ჩვენ უკვე სია უნდა მიგვეტანა ქალბატონ პრეზიდენტთან და ცოტა ხანში გაგვეცნო საზოგადოებისთვის, თუ ვინ იქნებოდა პირველი ოცეული". "და ყველაზე დიდი არგუმენტი, რომელმაც ააყირავა ეს მოლაპარაკება, იყო ბატონი ცუცქირიძის ეს დილის ინტერვიუ, რომელიც, ჩემი აზრით, არის აბსოლუტურად არასერიოზული და ჩვენ თუ გვინდა შევცვალოთ ხელისუფლება, თუ გვინდა, რომ გადავიდეთ ნამდვილ დემოკრატიულ მმართველობაზე, მაშინ უნდა მივეჩვიოთ, რომ კოალიციურ პარტნიორებს აზრის გამოხატვის უფლება აქვთ. თუმცა აქვე მინდა განვმარტო სრული პასუხისმგებლობით, რომ ჩემი კოალიციური პარტნიორები, ანა დოლიძეც, ალეკო ელისაშვილიც, ბატონი ცუცქირიძეც პირისპირ შეხვდნენ პრეზიდენტს და ამის მერე გადავწ...