თბილისის საქალაქო სასამართლოში პროცესი დღეს, 20 სექტემბერს გაიმართა. დაცვის მხარეს დღევანდელ პროცესზე შუამდგომლობა არ დაუყენებია. ადვოკატების განცხადებით, ბრალდებულის პოზიციაა, სასამართლოსთვის მიენდო გადაწყვეტილება, საქმეში არსებული საფუძვლების მიხედვით. მათივე თქმით, ბრალდებული თავს დამნაშავედ არ ცნობს და დუმილის უფლებას იყენებს. აღკვეთის ღონისძიების სახით პატიმრობის გამოყენება პროკურატურამ მოითხოვა. პროკურორმა შუამდგომლობის დაყენების დროს მკვლელობის მოტივზე ისაუბრა: "ბექა ჯაიანმა გენდერული იდენტობისა და შეუწყნარებლობის მოტივით, ვინაიდან კესარია აბრამიძე ტრანსგენდერი ქალია და არ სურდა მასთან ურთიერთობის გამჟღავნება, სტერეოტიპული და მესაკუთრეობრივი დამოკიდებულების გამო, მიაჩნდა, რომ კესარია აბრამიძეს არ ჰქონდა პირადი ცხოვრების დამოუკიდებლად წარმართვისა და სხვა პირებთან ურთიერთობის უფლება, განსაკუთრებული სისასტიკით, დანის გამოყენებით, სხეულის სხვადასხვა ადგილზე, კერძოდ, გულმკერდზე, ხერხემალზე, შუბლზე, იდაყვის მიდამოში, მარჯვენა და მარცხენა მხარზე სიცოცხლისთვის სახიფათო ჭრილობები მიაყენა", - თქვა მან. საქმეზე წინასასამართლო სხდომა 7 ნოემბერს დაინიშნა. საგამოძიებო უწყების მტკიცებით, 26 წლის კაცმა კესარია აბრამიძის მკვლელობა წინასწარ დაგეგმა. პროკურატურის ცნობით, მკვლელობამდე ერთი კვირით ადრე, კესარია აბრამიძესა და ბრალდებულს უთანხმოება მოუვიდათ და ამ მოტივით დაშორდნენ. მკვლელობის დღეს, 15:50 საათზე კი, ბრალდებულმა გასაშლელი დანა შეიძინა და მასთან შეხვედრა „განზრახვის სისრულეში მოყვანის მიზნით“ გადაწყვიტა. „ბრალდებულის განმარტებით, კესარია აბრამიძე შეხვედრაზე დასთანხმდა მათი ურთიერთობის ამსახველი ფოტოსურათების სოციალურ ქსელში გასაჯაროების სანაცვლოდ [რაზეც თანხმობა მიიღო]“, - აცხადებენ პროკურატურაში. ბრალდებული კესარია აბრამიძის საცხოვრებელ სახლში 18 სექტემბერს, საღამოს, დაახლოებით 19:10 საათზე მივიდა. საგამოძიებო უწყების ცნობით, შეხვედრის შემდეგ კაცმა ქალს ჯერ ხელი დაარტყა, შემდეგ კი დანით 28 ჭრილობა მიაყენა. „[მკვლელობის შემდეგ ბრალდებული] ნათესავის ბინაში მივიდა, გამოიცვალა მხოლოდ სისხლიანი მაისური და ბინა დატოვა, რის შემდგომაც ჯერ ტაქსით წავიდა დიდუბის მეტროსთან, საიდანაც მეტროთი მეტროსადგურ „სარაჯიშვილამდე“ იმგზავრა, ხოლო შემდეგ ასევე ტაქსით სენაკისკენ გაემართა“, - წერია პროკურატურის განცხადებაში, რომელშიც ასევე აღნიშნულია, რომ კაცი პოლიციამ ქუთაისის აეროპორტის მიმდებარე ტერიტორიაზე შეაჩერა და დააკავა. საგამოძიებო უწყებას მტკიცებულების სახით აქვს დანაშაულის დეტალებზე ბრალდებულთან საუბრის ამსახველი „ფარული აუდიო-ვიდეოჩანაწერი“. კესარია აბრამიძე თბილისში, საკუთარ ბინაში 18 სექტემბერს, საღამოს მოკლეს. შსს-ს ცნობით, გენდერის ნიშნით განსაკუთრებული სი...