უკრაინის გამარჯვების გეგმა ყველა ქვეყნისთვის იქნება ხელმისაწვდომი და ის უნდა ნახოს რუსეთმა, რომელიც ასევე უნდა იყოს წარმოდგენილი მშვიდობის მეორე სამიტზე, - ამის შესახებ უკრაინის პრეზიდენტმა ვოლოდიმირ ზელენსკიმ 20 სექტემბერს ჟურნალისტებთან შეხვედრაზე განაცხადა. "ჩვენ განვაცხადეთ, რომ მზად ვართ, მეორე სამიტზე ვიხილოთ რუსეთი, რადგან ყველა ჩვენი მოკავშირე, მათ შორის ყველა პარტნიორი, რომლებიც ჩვენს მხარეს არიან და ყოველთვის ილაშქრებენ რუსეთის აგრესიის წინააღმდეგ, - ყველა ამბობს, რომ რუსეთი [მშვიდობის] მეორე სამიტზე უნდა იყოს. იმიტომ, რომ რუსეთი იბრძვის უკრაინის წინააღმდეგ. ომის დასრულება კი არ შეიძლება ერთ-ერთი მხარის გარეშე", - განაცხადა ზელენსკიმ, რომლის სიტყვებიც რადიო თავისუფლების უკრაინულ სამსახურს მოჰყავს. ისე რომ დეტალებზე არაფერი უთქვამს, ზელენსკიმ აღნიშნა, რომ გამარჯვების გეგმა ითვალისწინებს უკრაინის სტრატეგიული პარტნიორების სწრაფ და კონკრეტულ ნაბიჯებს "დღევანდელი დღიდან დაწყებული დეკემბრის ბოლომდე". როგორც პრეზიდენტის ოფისმა გუშინ განაცხადა, მომავალ კვირას ვოლოდიმირ ზელენსკი ამერიკის შეერთებულ შტატებს ეწვევა, სადაც აშშ-ის პრეზიდენტ ჯო ბაიდენს შეხვდება და გამარჯვების გეგმას წარუდგენს. ზელენსკი ამ გეგმის დეტალების განხილვას ელოდება. უკრაინის პრეზიდენტი ასევე გეგმავს შეხვედრებს აშშ-ის ვიცე-პრეზიდენტ კამალა ჰარისთან, აშშ-ის კონგრესის წარმომადგენლებთან ორივე პარტიიდან და აშშ-ის 45-ე პრეზიდენტ დონალდ ტრამპთან. ასევე ნახეთ "გამარჯვების გეგმით" ზელენსკი "სამართლიანი მშვიდობის" მიღწევას აპირებს ...