რუსეთის არმიის უკრაინაში სრულმასშტაბიანი შეჭრის დაწყების შემდეგ, ფრონტზე 70 000-ზე მეტი რუსი ჯარისკაცი დაიღუპა. მათი ვინაობა ბიბიბისა და „მედიაზონის“ რუსულმა სამსახურებმა ღია წყაროების მონაცემების საფუძველზე დაადგინეს. (მათ შორისაა, როგორც ოფიციალური შეტყობინებები, ისე დაღუპულთა ნათესავების მიერ სოციალურ ქსელებში გამოქვეყნებული ცნობები). ან მონაცემებით, ყოველმა მეხუთე დაღუპულმა ომის დაწყების შემდეგ გააფორმა ხელშეკრულება ომში წასვლაზე. მეტიც, თუ 2022 წელს საშუალოსტატისტიკური რუსი სამხედრო მოსამსახურე დაახლოებით 21 წლისა იყო და ძირითადად ასეთი „კონტრაქტნიკები“ მსახურებდნენ ელიტარულ დანაყოფებში, ახლა, როგორც ჟურნალისტები წერენ, ასაკი გაიზარდა. „სულ უფრო ხშირად ფრონტზე იგზავნებიან 40, 50 და 60 წლის მამაკაცები, საბრძოლო გამოცდილებისა და სპეციალური მომზადების გარეშე“. ჟურნალისტური კვლევის თანახმად, 42-დან 50 წლამდე მოხალისეები ახლა ყველაზე ხშირად იღუპებიან ომში. სიებში 4100 ასეთი ადამიანია, რაც ამ კატეგორიის დანაკარგის 30%-ია. ამასთან, სამხედრო სარდლობამ დაიწყო იმ გამოცდილი მედესანტეებისა და სპეცრაზმელების დაზოგვა, რომლებიც გადარჩნენ შეჭრის პირველ თვეებში. ახლა მათ მხოლოდ პოზიციების დასაკავებლად და სნაიპერული ოპერაციებისთვის იყენებენ. გამომძიებელი ჟურნალისტები ასევე თვლიან, რომ რუსეთის არმიის დანაკარგები „აშკარად გაცილებით მაღალია, ვიდრე ეს ღია წყაროებიდან შეიძლება დადგინდეს“. სამხედრო ექსპერტები ამბობენ, რომ ეს ანალიზი მოიცავს რეალური სიკვდილიანობის მხოლოდ 45-65%-ს. ხოლო რუსეთის არმიის რეალური დანაკარგები უკრაინის ფრონტზე, სავარაუდოდ, 107,864-დან 155,804 ადამიანამდე უნდა მერყეობდეს. რუსეთის თავდაცვის სამინისტრო პირადი შემადგენლობის დანაკარგების შესახებ მონაცემებს არ ასაჯაროებს და ჟურნალისტების მიერ მოპოვებულ რიცხვებზე კომენტარს არ აკეთებს. საკუთარ დანაკარგებს არც უკრაინა ამჟღავნებს. ერთი კვირის წინ The Wall Street Journal-მა გაავრცელა შეფასება, რომლის თანახმად, რუსეთისა და უკრაინის სამხედროების ჯამური დანაკარგები 2022 წელს სრულმასშტაბიანი ომის დაწყების შემდეგ შეიძლება მილიონს აჭარბებდეს. გამოცემა ეფუძნება არაოფიციალურ გათვლებს, მათ შორის - დასავლურ დაზვერვას. WSJ-ის შეფასებით, დაღუპული უკრაინელი ჯარისკაცების რაოდენობა 80 ათასს აღწევს, რუსებისა დაახლოებით 200 ათასამდეა. უკრაინის არმიაში დაიჭრა დაახლოებით 400 ათასი ადამიანი, ამდენივე - რუსეთის არმიაში. რუსეთის არმიისთვის დიდი დანაკარგები რთული ასატანია, ნათქვამია მასალაში, მაგრამ ნაკლები მოსახლეობის მქონე უკრაინისთვის ისინი შეიძლება ბევრად უფრო მძიმე იყოს. ასევე ნახეთ WSJ: რუსეთისა და უკრაინის დაღუპულ და დაჭრილ სამხედროთა საერთო რაოდენობა მილიონს აღწევს ...