უფრო და უფრო მეტი რუსეთის მოქალაქე უჭერს მხარს უკრაინიდან ჯარების გაყვანას და სამშვიდობო მოლაპარაკებებს. ამის შესახებ ნათქვამია საგამოძიებო პროექტ „ქრონიკებისა“ და Extreme Scan-ის (ექსტრემალური სკანირების) მიერ ჩატარებული კვლევაში. ომისადმი დამოკიდებულების კვლევა დროში დაემთხვა რუსეთის ფედერაციაში მობილიზაციის დაწყების მეორე წლისთავს. კვლევაში 18 წელზე უფროსი ასაკის 800 რესპონდენტი მონაწილეობდა.~ უკრაინიდან ჯარების გაყვანას და კიევთან მშვიდობიან მოლაპარაკებებს ე.წ. "სპეციალური სამხედრო ოპერაციის" (როგორც რუსეთის ხელისუფლება უკრაინაში სრულმასშტაბიან შეჭრას უწოდებს) მიზნების მიღწევის გარეშე, მხარს გამოკითხულთა 49%-ი დაუჭერს. მკვლევრები შედარებისთვის იშველიებენ 2023 წლის თებერვლიდან ჩატარებული ექვსი კვლევის შედეგებს. მათგან პირველ ოთხში გამოკითხულთა 39% -40% მხარს უჭერდა უკრაინიდან ჯარების გაყვანას და სამშვიდობო მოლაპარაკებებს, მაგრამ 2024 წლის აგვისტოსა და სექტემბერში მათი რიცხვი შესაბამისად 48% და 49%-მდე გაიზარდა. გამოკითხულთა 32%-ი მზად არის მონაწილეობა მიიღოს ომში თავდაცვის სამინისტროს ბრძანებით, 29%-ი კი არ არის მზად საომარ მოქმედებებისთვის. მკვლევართა მიერ გამოკითხული რუსების 29%-ი მხარს დაუჭერდა მობილიზაციის ახალ ტალღას. რესპონდენტებმა ასევე უპასუხეს კითხვას იმ მოხალისეების მოტივების შესახებ, რომლებიც უკრაინის წინააღმდეგ ომში მიდიან. გამოკითხულთა 37%-ი თვლის, რომ მოხალისეები მატერიალური პრობლემების მოსაგვარებლად მიდიან ომში, 24%-ი კი თვლის, რომ მოხალისეები თავიანთ სამოქალაქო მოვალეობას ასრულებენ. 2022 წლის 21 სექტემბერს გამოცხადებული „ნაწილობრივი მობილიზაციის“ შემდეგ, რუსეთმა დაიწყო ე.წ. კონტრაქტით დაქირავების (გადაბირების) აქტიური კამპანია, რომლის მთავარი ხიბლი ფულია: 1 აგვისტოდან, რუსეთის თავდაცვის სამინისტროსთან ხელშეკრულების გაფორმების შემდეგ, რუსეთის მოქალაქეები ფედერალური ბიუჯეტიდან ერთჯერადად იღებენ 400 ათას რუბლს (დაახლოებით 11 ათასი ლარი) (ადრე ეს თანხა 195 ათასი რუბლი იყო), რასაც ემატება მნიშვნელოვანი თანხა რეგიონული ბიუჯეტიდან. ჯამში ზოგიერთ რეგიონში „კონტრაქტნიკები“ ერთჯერადად თითქმის 2 მილიონ რუბლს (დაახლოებით 55 ათასი ლარი) იღებენ. რუსეთის ხელისუფლების განცხადებით, სიახლემ შესაძლებელი გახადა 1,5 წელიწადში 730 ათასი ახალი საკონტრაქტო ჯარისკაცის დაქირავება. ასევე ნახეთ მოსკოვს სულ უფრო ძვირი უჯდება ახალი „საზარბაზნე ხორცი“ ...