ინფორმაციის თავისუფლების განვითარების ინსტიტუტი (IDFI) საქართველოში რუსეთის მოქალაქეების მიერ რეგისტრირებული კომპანიების შესახებ კვლევას აქვეყნებს, სადაც ნათქვამია, რომ რუსული ბიზნესების რაოდენობა 2024 წლის ზაფხულის მონაცემებით ისტორიულ მაქსიმუმზეა. ოფიციალური სტატისტიკით, 2024 წლის პირველი ივნისის მდგომარეობით, საქართველოში რუსეთის მოქალაქეების მფლობელობაშია 37,400-მდე კომპანია, ეს კი საქართველოში არსებული აქტიური სტატუსის მქონე კომპანიების 8%-ზე მეტია. IDFI-ს კვლევის მიხედვით: რუსეთის მოქალაქეების მიერ რეგისტრირებული კომპანიების დიდი ნაწილი, 30,000-ზე მეტი ბიზნეს სუბიექტი 2022 წლის შემდგომ არის დარეგისტრირებული. 500-მდე შემთხვევაში კომპანიის მფლობელი საქართველო-რუსეთის ორმაგი მოქალაქეა; 2 041 კომპანიის თანადამფუძნებელი საქართველოს მოქალაქეა. რეგისტრირებული აქტიური სტატუსის კომპანიების 89% მცირე ზომისაა, საშუალო და მსხვილი კომპანიების რაოდენობა ჯამში მხოლოდ 0.5%-ია, ხოლო 10.6%-ის შემთხვევაში ეკონომიკური ზომა ჯერ-ჯერობით უცნობია. კომპანიების 93% ინდივიდუალური მეწარმეების მიერ არის დაფუძნებული. რუსული კომპანიების ნაწილი აქტიურად იღებს მონაწილეობას სახელმწიფო ტენდერებშიც, კერძოდ, გზების და ავტობანების მშენებლობის მიმართულებით. მაგალითად, შპს “ზუგდიდის საგზაო სამმართველოს”, რომლის 51%-ს რუსეთის მოქალაქე ალექსანდრ ივანოვი ფლობს, 56 მოგებულ ტენდერში ჯამში სახელმწიფო ბიუჯეტიდან 20,725,249 მლნ აქვს მიღებული. რუსული კავშირის მქონე კომპანიები მონაწილეობას იღებენ სახელმწიფო პრივატიზების პროცესშიც. მაგალითად, 2024 წელს გამართულ ერთ-ერთ ყველაზე მსხვილ აუქციონში კომპანია “ტიბინი ჯგუფმა” გაიმარჯვა და 6,5 მლნ ლარად აიღო თბილისში, ქეთევან დედოფლის გამზირზე მდებარე 3 299 კვ.მ. არასასოფლო-სამეურნეო დანიშნულების მიწის ნაკვეთი და მასზე განთავსებული შენობა-ნაგებობები. კომპანიის 50%-ს რუსეთის მოქალაქე იაჰია აუდახი ფლობს, 50%-ს კი საქართველოსა და რუსეთის ორმაგი მოქალაქეობის მქონე ზურაბ ახალაია. IDFI-ის კვლევა საქსტატის ოფიციალურ მონაცემებს ეყრდნობა, თუმცა ორგანიზაცია აღნიშნავს, რომ ზუსტი სურათის დახატვა, რა რაოდენობის რუსული კაპიტალი ბრუნავს ქართულ ეკონომიკაში, რთული სათქმელია იმის გათვალისწინებით, რომ რუსული ბიზნესი ხშირად იყენებს შუამავალ კომპანიებს, ფიქტიურ მისამართებს და სხვა ხრიკებს. ასევე ნახეთ ერთ ფიქტიურ მისამართზე 300 რუსული ბიზნესი - რატომ ხდება ასე საქართველოში? "ბოლო წლებში რუსეთთან გაზრდილი საგარეო ვაჭრობა და რუსული კომპანიების შემოდინება განაპირობებს ქვეყნის ეკონომიკის რუსეთზე დამოკიდებულების ზრდას, რაც საქართველოსთვის მნიშვნელოვანი რისკის მატარებელია" - წერს კვლევაში არასამთავრობო ორგანიზაცია და ხაზს უსვამს, რომ რუსეთი ეკონომიკ...