კვირას ღამით, ისრაელის სამხედროები შევიდნენ კატარის ტელეკომპანია „ალ ჯაზირის" ოფისში, რომელიც მდებარეობს მდინარე იორდანეს დასავლეთ სანაპიროზე, ქალაქ რამალაში. სამხედროებმა ტელევიზიის თანამშრომლებს გადასცეს ორდერი ბიუროს დახურვისა და მაუწყებლობის 45 დღით შეწყვეტის მოთხოვნით. ტელეარხმა სამხედროებთან მოლაპარაკებები პირდაპირ ეთერში აჩვენა, რის შემდეგაც მაუწყებლობა შეწყდა. სამხედროებმა ტელევიზიის კუთვნილი აღჭურვილობის კონფისკაცია მოახდინეს. „ალ ჯაზირის“ პალესტინის ბიუროს დირექტორმა ვალიდ ალ-ომარიმ განაცხადა, რომ მაუწყებლობის შეწყვეტის ბრძანება პერსონალისთვის მოულოდნელი არ ყოფილა. "ჩვენ გაგებული გვქონდა, რომ [ისრაელის] მთავრობა ამაზე მსჯელობდა და ოკუპირებულ დასავლეთ სანაპიროს სამხედრო ადმინისტრაციას არხის დახურვას სთხოვდა. ჩვენ, უბრალოდ, არ ვიცოდით, რომ ეს დღეს მოხდებოდა", - განაცხადა არხის ჟურნალისტმა ნიდა იბრაჰიმმა. პალესტინელი ჟურნალისტების სინდიკატმა დაგმო ისრაელის ქმედებები და მას ჟურნალისტების უფლებების დარღვევა და თავისუფალ მედიაზე თავდასხმა უწოდა. მაისში ისრაელმა დახურა „ალ ჯაზირის" ოფისი იერუსალიმში და შეწყვიტა არხის მაუწყებლობა ქვეყანაში, მაგრამ ტელეკომპანია აგრძელებდა საქმიანობას პალესტინის ავტონომიაში. ისრაელის ხელისუფლება არხს ქვეყნის უსაფრთხოების მუქარაში ადანაშაულებს იმის გამო, თუ როგორ აშუქებს იგი ღაზის სექტორში მიმდინარე საომარ მოქმედებებსა და მთლიანად რეგიონის მოვლენებს. ისრაელელი მინისტრები ასევე ადანაშაულებენ არხს ისრაელის საწინააღმდეგო პროპაგანდასა და პალესტინური რადიკალური დაჯგუფება ჰამასის მხარდამჭერი, ისრაელის საწინააღმდეგო ნარატივების ტრანსლირებაში. ისრაელის თავდაცვის არმიის ინფორმაციით, წუხელ ლიბანიდან ისრაელის ტერიტორიაზე ასზე მეტი რაკეტა გაუშვეს, მათი უმეტესობა ისრაელის საჰაერო თავდაცვამ გადაიჭირა. ისრაელმა თავდასხმებში დაადანაშაულა ლიბანური დაჯგუფება ჰეზბოლა, რომელიც აშშ-სა და რამდენიმე სხვა ქვეყანაში ტერორისტულად არის აღიარებული. ასევე ნახეთ პეიჯერებით თავდასხმა - ესკალაციის ახალი ფაზა ჰეზბოლასა და ისრაელს შორის ...