დასავლეთ გერმანიის ბრანდენბურგის ლანდტაგის (მხარის პარლამენტი) არჩევნებში, პირველი პროგნოზებით, მცირედი უპირატესობით გაიმარჯვა გერმანიის სოციალ-დემოკრატიულმა პარტიამ. მას ამომრჩეველთა 31,0%-მა დაუჭირა მხარი. მეორე ადგილზე 30,0%-ით გავიდა მემარჯვენე-პოპულისტური „ალტერნატივა გერმანიისათვის (AfD)“. მემარცხენე პოპულისტი სარა ვაგენკნეხტის „სარა ვაგენკნეხტის ალიანსმა“ და ქრისტიან-დემოკრატიულმა კავშირმა ხმათა თანაბარი რაოდენობა 12-12% მიიღეს. ადგილობრივ პარლამენტში, სავარაუდოდ, მოხვდებიან „90-იანების კავშირი“/“მწვანეები“, რომლებსაც ხმათა 5,0% აქვთ. 2019 წლის არჩევნებთან შედარებით, SPD-მ შედეგი თითქმის ოთხი პროცენტით გააუმჯობესა. არჩევნებამდე მოქალაქეებში პოპულარულმა პოლიტიკოსმა, ბრანდენბურგის სოციალ-დემოკრატმა პრემიერ-მინისტრმა დიტმარ ვოიდკემ სარისკო ნაბიჯი გადადგა და განაცხადა, რომ მთავრობის მეთაურის თანამდებობიდან გადადგებოდა, თუ პირველ ადგილზე "ალტერნატივა გერმანიისთვის" გავიდოდა. როგორც ჩანს, ეს სტრატეგია წარმატებული აღმოჩნდა. მიუხედავად ამისა, მემარჯვენე-პოპულისტურმა „ალტერნატივა გერმანიამ“ თავისი საუკეთესო შედეგი აჩვენა ბრანდენბურგის ლანდტაგის არჩევნებში და მიიღო ხუთ-ნახევარი პროცენტით მეტი ხმა, ვიდრე წინა არჩევნებში. საარჩევნო კამპანიაში AfD-ს მთავარი დევიზი იყო მიგრანტების ნაკადის წინააღმდეგ ბრძოლა, რაც მიწის ამომრჩეველთა მესამედისთვის აღმოჩნდა მიმზიდველი. მანამდე, სექტემბრის დასაწყისში, არჩევნები ჩატარდა გერმანიის ორ მხარეში: საქსონიასა და თიურინგიაში, რომლებშიც მემარცხენე და მემარჯვენე პოპულისტებმა გაიმარჯვეს. გერმანიის მემარჯვენე პოპულისტური პარტია „ალტერნატივა გერმანიისათვის“ (AfD) პირველად გავიდა პირველ ადგილზე თიურინგიაში, ხოლო ქრისტიან-დემოკრატიული კავშირი საქსონიაში დაწინაურდა და მცირედით აჯობა AfD-ს. ასევე ნახეთ საქსონიასა და თიურინგიაში გამართულ რეგიონალურ არჩევნებში პოპულისტები იმარჯვებენ ...