რუსეთისა და ბელარუსის მოჭადრაკეები კვლავ ვერ შეძლებენ საერთაშორისო ტურნირებში მონაწილეობას. ჭადრაკის საერთაშორისო ფედერაციის(FIDE) გენერალურმა ასამბლეამ ხმათა უმრავლესობით უარყო ყირგიზეთის წინადადება, რომელიც უკრაინაში რუსეთის ფართომასშტაბიანი შეჭრის გამო 2022 წლიდან ამოქმედებული სანქციების მოხსნას ეხებოდა. სააგენტო Reuters-ის ცნობით, ბუდაპეშტში, გენერალური ასამბლეის სხდომაზე 22 სექტემბერს ჩატარებული კენჭისყრისას რუსი და ბელარუსი მოჭადრაკეებისთვის აკრძალვის გაუქმებას მხარი დაუჭირა 21-მა დელეგატმა. 41 წინააღმდეგი იყო. ამასთან, ასამბლეამ ხმათა უმრავლესობით გადაწყვიტა, რომ ფედერაცია შეისწავლის ტურნირებზე 12 წელზე უმცროსი ასაკის და შეზღუდული შესაძლებლობის მქონე რუსი და ბელარუსი მოჭადრაკეების დაშვების საკითხს და შესაბამის კონსულტაციას გამართავს საერთაშორისო ოლიმპიურ კომიტეტთან. FIDE-ს წლებია მჭიდრო კავშირები აქვს რუსეთთან. 2018 წლიდან ჭადრაკის საერთაშორისო ფედერაციის პრეზიდენტია არკადი დვორკოვიჩი, რომელიც მანამდე რუსეთის ვიცე-პრემიერი იყო. ფედერაციის პრეზიდენტის პოსტზე დვორკოვიჩის წინამორბედიც რუსეთის წარმომადგენელი იყო - კირსან ილუმჟინოვი, რომელიც FIDE-ს 1995 წლიდან ხელმძღვანელობდა. ...