საფრანგეთში ქართველთა ისტორიული სათვისტომოს ხელმძღვანელი, საქართველოს პრეზიდენტის, სალომე ზურაბიშვილის ძმა ოთარ ზურაბიშვილი ამბობს, რომ არ მიიწვიეს ლევილში 23 სექტემბერს დაგეგმილ ღონისძიებაზე. საქართველოს კულტურის სამინისტროს ორგანიზებით, აღინიშნება 1924 წლის აჯანყების ასი წლისთავი. ფეისბუკის პირად გვერდზე გამოქვეყნებულ ვიდეომიმართვაში ოთარ ზურაბიშვილი ამბობს, რომ ღონისძიებაზე მიწვეული არ არის ქართველთა ისტორიული სათვისტომო. „საფრანგეთში, ლევილის ტერიტორიაზე, პირველად ამ [„ქართული ოცნების“] მთავრობის მიერ აღინიშნება 1924 წლის აჯანყების მე-100 წლისთავი. ქართველთა ისტორიული სათვისტომო, რომელიც 100 წლის მანძილზე ყოველ წელს, როგორც ამ წელს, აღნიშნავს ამ უაღრესად მნიშვნელოვან ამ თარიღს, არ არის მოწვეული“, - ამბობს ის. ოთარ ზურაბიშვილი პოლიტიკური ემიგრანტების შეურაცხყოფად მიიჩნევს საქართველოს ამჟამინდელი ხელისუფლების წარმომადგენელთა მისვლას ლევილის სასაფლაოზე. „პრორუსული მთავრობა ლევილის ჩაკეტილი კარების მიღმა ცდილობს არჩევნებისთვის მოტყუებით მოიზიდოს ხმები, შეიფარდოს აჯანყების უნიკალური სიმბოლო და სცადოს, დაარწმუნოს ამომრჩეველი, რომ ვითომ ამ სწორ გზაზე დგას. სიმართლე სულ სხვაა, არავის აღარ სჯერა მთავრობის ეროვნული აღტაცება. სწორედ 1924 წლის აჯანყება, მისი უკომპრომისო წინააღმდეგობით, შეგვახსენებს, რა არის და უნდა იყოს ჩვენი დღევანდელი და სამომავლო ბრძოლები. ხელისუფლება, რომელიც ხვალ [23 სექტემბერს] გაივლის სასაფლაოზე, არის ის, ვინც ადანაშაულებს ქართველებს და საქართველოს 2008 წლის ომის დაწყებაში. ეს იქნება გარდაცვლილი პოლიტიკური ემიგრანტების შეურაცხყოფა. არა ლევილის პრივატიზაციას! არა დამოუკიდებლობისთვის ბრძოლის სიმბოლოების მისაკუთრებას! არა რუსულ მთავრობას!“ - თქვა ქართველთა ისტორიული სათვისტომოს ხელმძღვანელმა. პრეზიდენტმა ზურაბიშვილმა შეკითხვაზე, თქვენ გამო სჯიან თქვენს ძმას? - ჟურნალისტებს ასე უპასუხა: „მე მგონი, ისჯება ყველა ის, ვინც არ არის თანახმა იმ ადამიანებთან [თანამშრომლობაზე], რომლებიც საქართველოს რუსეთს აბარებენ“. განახლება კულტურის სამინისტროს საზოგადოებასთან ურთიერთობის სამსახურის წარმომადგენელმა მოგვწერა, რომ „ღონისძიებას ესწრებიან ჟორდანიას, რამიშვილის, ჩხენკელის და ფაღავას შთამომავლები“. კულტურის მინისტრმა თეა წულუკიანმა რამდენიმე დღის წინ ტელეკომპანია „იმედის“ ეთერში ილაპარაკა ლევილის ქართველთა მამულში დაგეგმილი ღონისძიების შესახებ. მან თქვა, რომ 23 სექტემბერს აღინიშნება მამულის საქართველოსთვის ოფიციალურად დაბრუნების მე-8 წლისთავი. ამასთან, მინისტრის განცხადებით, ამ თარიღს დაამთხვიეს 1924 წლის აჯანყების 100 წლისთავის აღნიშვნა. ღონისძიება მოიცავს დაბა ლევილში დაკრძალული ქართველი აჯანყებულებისთვის პატივის მიგებას. ასევე ნახეთ საპირფ...