ანექსირებულ ყირიმში რუსეთის სასამართლომ უკრაინის სასარგებლოდ ჯაშუშობის ბრალდებით უკრაინელს 14 წლით მიუსაჯა პატიმრობა მკაცრი რეჟიმის კოლონიაში. ამის შესახებ ფედერალურ სამსახურზე დაყრდნობით იტყობინება რუსეთის მედია. გამოცემა "მედიაზონა" წერს, რომ უწყების მიერ გავრცელებული ინიციალები - მ.ა. სუხაჩოვი - ემთხვევა მიხაილ სუხაჩოვს, რომლის წინააღმდეგაც მსგავსი შინაარსის საქმე განიხილებოდა ჯერ სვერდლოვსკის საოლქო სასამართლოში, შემდეგ კი საქმე ანექსირებულ ყირიმში გაიგზავნა. გამოძიების ვერსიით, სუხაჩოვი უკრაინას გადასცემდა მონაცემებს რუსეთის ქვედანაყოფების საზენიტო-სარაკეტო სამუშაოებზე ნაწილობრივ ოკუპირებული ზაპოროჟიეს ოლქის ტერიტორიაზე. უკრაინაში რუსეთის ძალების სრული მასშტაბით შეჭრის შემდეგ, ანექსირებულ ყირიმში მასობრივად დევნიან ყველას, ვინც ომის წინააღმდეგ გამოდის. 2023 წელს რუსეთში და უკრაინაში რუსეთის მიერ კონტროლირებულ ტერიტორიებზე, სულ მცირე, 98 ადამიანი იყო ეჭვმიტანილი სახელმწიფოს ღალატის, ჯაშუშობისა და უცხოელებთან თანამშრომლობის დანაშაულებში. რუსეთმა უკრაინის ნახევარკუნძულის, ყირიმის, ანექსირება 2014 წლის მარტში განახორციელა. საერთაშორისო ორგანიზაციებმა ყირიმის ანექსირება უკანონოდ გამოაცხადეს და რუსეთის ნაბიჯები დაგმეს, დასავლეთის ქვეყნებმა რუსეთს დაუწესეს ეკონომიკური სანქციები. კრემლი ნახევარკუნძულის ანექსირებას უარყოფს და ამას უწოდებს "ისტორიული სამართლიანობის აღდგენას". ასევე ნახეთ „ჩვენ ამ ომს წავაგებთ“ - უკრაინაში რუსეთის „არქტიკული ბრიგადის“ დაღუპვის ამბავი ...