აშშ დამატებით ძალებს გზავნის ახლო აღმოსავლეთში, იმ ფონზე, როცა ლიბანში მკვეთრად მოიმატა ძალადობის დონემ ისრაელსა და ჰეზბოლას შორის და რამაც, თავის მხრივ, გააძლიერა შეშფოთება უფრო ფართო რეგიონული ომის თაობაზე, აცხადებს პენტაგონი 23 სექტემბერს. პენტაგონის პრესმდივანს, გენერალ-მაიორ პეტ რაიდერს, არ დაუკონკრეტებია დეტალები იმაზე, თუ რა რაოდენობის იქნება დამატებითი ძალები ან რა ამოცანების შესრულება დაეკისრება მათ. აშშ-ს ამჟამად რეგიონში 40 000-მდე სამხედრო ჰყავს განთავსებული. რაიდერმა ასევე თქვა, რომ აშშ-ის თავდაცვის მინისტრმა ლოიდ ოსტინმა და ისრაელის თავდაცვის მინისტრმა იოავ გალანტმა 22 სექტემბერს ტელეფონით ილაპარაკეს. რაიდერის თანახმად, ოსტინმა მკაფიოდ განაცხადა, რომ აშშ "მიზანმიმართული რჩება აშშ-ის ძალების და თანამშრომლების დაცვაში და ნებისმიერი რეგიონული ძალის შეკავებაში სიტუაციის სათავისოდ გამოყენების ან კონფლიქტის გაფართოებისგან". 23 სექტემბერს ისრაელის საჰაერო დარტყმებს 270-ზე მეტი ლიბანელი შეეწირა. ეს თავდასხმები ყველაზე ინტენსიური იყო მას მერე, რაც 2006 წელს ისრაელსა და ჰეზბოლას შორის ომი დაიწყო. ისრაელის არმიამ ლიბანის სამხრეთსა და აღმოსავლეთში მცხოვრებ მოქალაქეებს, ჰეზბოლას ძალების წინააღმდეგ კონფლიქტის გაფართოების ფონზე, ევაკუაციისკენ მოუწოდა. ...