რუსეთმა უკრაინის რეგიონებზე დრონებით და რაკეტებით მორიგი იერიში მიიტანა. მთავარი სამიზნე ისევ ენერგოობიექტები იყო. უკრაინის საჰაერო ძალების მიერ დღეს, 24 სექტემბერს დილით, გამოქვეყნებული მონაცემებით, ღამის განმავლობაში საოკუპაციო ძალებმა უკრაინას შეუტიეს 4 რაკეტით და 81 უპილოტო საფრენი აპარატით. საჰაერო ძალების თანახმად, კიევის, ჟიტომირის, ჩერკასის, ვინიცის, კიროვოგრადის, პოლტავის, სუმის და ნიკოლაევის ოლქებში ჩამოაგდეს 66 რუსული დრონი, 13 კი ლოკალურად დაიკარგა. მოგერიებული რუსული დრონების ნამსხვრევებმა პოლტავის ოლქის მირგოროდის რაიონში დააზიანა სახლები და ენერგოობიექტები, არავინ დაშავებულა - დაწერა ტელეგრამზე პოლტავის საოლქო-სამხედრო ადმინისტრაციის ხელმძღვანელმა ფილიპ პრონინმა. მისი ინფორმაციით, ენერგოობიექტების დაზიანების გამო ელექტროენერგია შეუწყდა 20 დასახლებულ პუნქტს. 13 უკრაინული დრონის მოგერიებას იუწყება რუსეთის თავდაცვის სამინისტრო. მის მიერ დილით გამოქვეყნებული მონაცემებით, 6-6 უპილოტო საფრენი აპარატი კურსკის და ბელგოროდის ოლქებში ჩამოაგდეს და 1 - ბრიანსკის ოლქში. ხმელეთზე შედეგების შესახებ თავდაცვის სამინისტრო არაფერს წერს. საომარი მოქმედებების პირობებში მხარეთა მიერ გავრცელებული ცნობების გადამოწმება გართულებულია. ასევე ნახეთ ზელენსკის გეგმის მთავარი პუნქტი უსაფრთხოების გარანტიებია - "თაიმსი" ენერგეტიკის საერთაშორისო სააგენტოს შეფასებით, მოახლოებული ზამთარი, ომის დაწყების შემდეგ, უკრაინის ენერგოსისტემისთვის ყველაზე მძიმე გამოცდა იქნება, რადგან ენერგოობიექტებზე რუსეთის მუდმივი შეტევების გამო უკრაინის ენერგეტიკა კოლაფსის ზღვარზეა. უკრაინის ენერგოობიექტების მიზანმიმართულად განადგურების გამო, 2024 წლის 5 მარტს სისხლის სამართლის საერთაშორისო სასამართლომ გასცა რუსეთის შავი ზღვის ფლოტის სარდლის, ადმირალ ვიქტორ სოკოლოვის და საჰაერო-კოსმოსური ძალების შორეული ავიაციის სარდლის, გენერალ-ლეიტენანტ სერგეი კობილაშის დაპატიმრების ორდერები. სოკოლოვი და კობილაში ეჭვმიტანილი არიან ომის დანაშაულში, კერძოდ, მათი ხელმძღვანელობით მოქმედი ძალების მიერ უკრაინის ენერგოობიექტების განზრახ განადგურებაში, რამაც მნიშვნელოვანი ზიანი მიაყენა მშვიდობიან მოსახლეობას. რუსი ადმირალი და გენერალი ეჭვმიტანილი არიან ანტიჰუმანური ქმედებებით კაცობრიობის წინააღმდეგ დანაშაულის ჩადენაშიც. ...