უკრაინის „გამარჯვების გეგმა", რომელსაც პრეზიდენტი ვოლოდიმირ ზელენსკი აშშ-ს წარუდგენს, სამხედრო და დიპლომატიური ნაწილებისგან შედგება და მოიცავს მკაფიო ხედვას იმ ნაბიჯების, რომლებიც აუცილებელია სამართლიანი და ხანგრძლივი მშვიდობის უზრუნველსაყოფად. ამის შესახებ უკრაინის პრეზიდენტის ოფისის ხელმძღვანელმა ანდრი ერმაკმა განაცხადა ნიუ-იორკში, საერთაშორისო ურთიერთობების საბჭოში გამოსვლისას. უკრაინის პრეზიდენტის ოფისის ოფიციალურ საიტზე 24 სექტემბერს გამოქვეყნებული ინფორმაციით, ერმაკმა თქვა, რომ უკრაინას ბრძოლის ველზე უპირატესობა უნდა ჰქონდეს, რათა პუტინი აიძულონ, შეწყვიტოს საბრძოლო მოქმედებები. ამიტომ, კიევი მოკავშირეებს მოუწოდებს, სამხედრო დახმარება გაზარდონ და დააჩქარონ და მეტი ინვესტიცია ჩადონ უშუალოდ უკრაინული იარაღის წარმოებაში. ერმაკმა მნიშვნელოვანი უწოდა იმასაც, რომ უკრაინას ჰქონდეს დასავლური იარაღის რუსეთის ტერიტორიაზე დარტყმებისთვის გამოყენების ნებართვა. უკრაინის პრეზიდენტის ოფისის ხელმძღვანელის თანახმად, „გამარჯვების გეგმის“ ნაწილია ნატოში უკრაინის მიწვევა. ერმაკმა პარტნიორ სახელმწიფოებს მოუწოდა, ყურადღება არ მიაქციონ რუსეთის მუქარას, რომ ეს მეტ ესკალაციას გამოიწვევს. ასევე ნახეთ ზელენსკის გეგმის მთავარი პუნქტი უსაფრთხოების გარანტიებია - "თაიმსი" უკრაინის პრეზიდენტი ვოლოდიმირ ზელენსკი, რომელიც აშშ-ში იმყოფება, „გამარჯვების გეგმას" ამ კვირაში გააცნობს პრეზიდენტ ჯო ბაიდენს და პრეზიდენტობის დემოკრატ და რესპუბლიკელ კანდიდატებს, კამალა ჰარისს და დონალდ ტრამპს. 23 სექტემბერს უკრაინის პრეზიდენტის ოფისმა გაავრცელა ცნობა, რომ ზელენსკიმ კიევის გეგმა ნიუ-იორკში, გაეროს გენერალური ასამბლეის ფარგლებში გამართულ შეხვედრაზე გააცნო კონგრესის ორპარტიულ დელეგაციას. რუსეთის არმია უკრაინის ტერიტორიაზე 2022 წლის 24 თებერვალს შეიჭრა. პრეზიდენტმა პუტინმა "სპეციალური სამხედრო ოპერაციის" მიზნად გამოაცხადა უკრაინის "დემილიტარიზაცია და დენაციფიკაცია". უკრაინაში რუსული არმიის ფართომასშტაბიან შეჭრას წინ უძღოდა პუტინის მიერ უკრაინის ორი სეპარატისტული რეგიონის, დონეცკის და ლუგანსკის ე.წ. სახალხო რესპუბლიკების "დამოუკიდებლობის" აღიარება. მანამდე, რუსეთმა მოითხოვა, რომ უკრაინა არ გახდეს ნატოს წევრი. 2022 წლის 30 სექტემბერს, რუსეთმა თავის ტერიტორიებად გამოაცხადა უკრაინის ხერსონის, ზაპოროჟიეს, დონეცკისა და ლუგანსკის ოლქები, თუმცა სრულად ვერცერთ მათგანს ვერ აკონტროლებს. 2014 წლიდან რუსეთის მიერ ანექსირებულია უკრაინის ყირიმის ნახევარკუნძული და ქალაქი სევასტოპოლი. უკრაინას მიზნად გამოცხადებული აქვს ტერიტორიული მთლიანობის სრულად აღდგენა. ...