ლიბანის ხელისუფლებამ განაცხადა, რომ 23 სექტემბრიდან, სულ მცირე, 558 ადამიანია დაღუპული ისრაელის ავიადარტყმების შედეგად. მანამდე ბეირუთი 492 დაღუპულის შესახებ იუწყებოდა. ლიბანის მთავრობის მიერ დღეს, 24 სექტემბერს, გამოქვეყნებული მონაცემებით, დაღუპულთა შორისაა 50 ბავშვი და 94 ქალი. დაჭრილია 1835 ადამიანი. ისრაელი ირწმუნება, რომ ლიბანის სამხრეთში და ზოგიერთ აღმოსავლეთ რაიონში მისი სამიზნეა ირანის მიერ მხარდაჭერილი გასამხედროებული ისლამისტური ორგანიზაცია ჰეზბოლას ობიექტები. ლიბანის ხელისუფლება ამტკიცებს, განადგურებული ობიექტების დიდი ნაწილი საცხოვრებელი სახლებია. 24 სექტემბერს ისრაელის არმიამ განაცხადა, რომ ჰეზბოლამ ისრაელის ჩრდილოეთს კვლავ შეუტია 20-მდე რაკეტით, რომელთა ნაწილი მოიგერიეს, ნაწილი კი დაუსახლებელ ადგილას ჩამოვარდა. ისრაელის ავიაციამ ლიბანის ტერიტორიაზე საპასუხო იერიში მიიტანა. ჰეზბოლას თანახმად, რაკეტებით დაარტყეს ისრაელის ავიაბაზას, რომელიც ქალაქ აფულასთან მდებარეობს. ერთი დღით ადრე, 23 სექტემბერს ისრაელის არმიამ ავიაგამანადგურებლებით და დრონებით ბოლო წლების განმავლობაში ყველაზე მასშტაბური იერიში მიიტანა ლიბანის სამხრეთზე და აღმოსავლეთში მდებარე ბეკაას ველის რაიონზე. ისრაელის თავდაცვის ძალების თანახმად, დაარტყეს ჰეზბოლას 1100-ზე მეტ ობიექტს, მათ შორის რაკეტების და დრონების საწყობებს. ასევე ნახეთ ისრაელმა ჰეზბოლას წინააღმდეგ ოპერაციის გამო საგანგებო მდგომარეობა გამოაცხადა ისრაელის არმიის გენერალური შტაბის უფროსმა ჰერცი ჰალევიმ განაცხადა, რომ ოპერაცია გაგრძელდება და მისი სამიზნეა ინფრასტრუქტურა, რომელსაც ჰეზბოლა ისრაელთან საომრად ქმნიდა ბოლო ოცი წლის განმავლობაში. ისრაელის პრემიერ-მინისტრმა ბენიამინ ნეთანიაჰუმ 23 სექტემბერს ვიდეომიმართვა გაავრცელა და ჰეზბოლას მიერ კონტროლირებული რაიონების მცხოვრებთ დროებით ევაკუაციისკენ მოუწოდა. ნეთანიაჰუს განცხადებით, ისრაელი ებრძვის არა მშვიდობიან ხალხს, არამედ ჰეზბოლას, რომელიც დიდი ხანია მათ ფარად იყენებს. ლიბანის მთავრობამ ისრაელი ფსიქოლოგიურ ომშიც დაადანაშაულა. ლიბანის ჯანდაცვის მინისტრ ფირას აბიადის განცხადებით, ათასობით ოჯახი იძულებული გახდა, საომარი მოქმედებების ზონიდან გაქცეულიყო. აბიადმა BBC-ს განუცხადა, რომ ისრაელის მთავრობას განზრახული აქვს ესკალაცია და პროვოცირება. ასევე ნახეთ პენტაგონი: აშშ დამატებით ძალებს გზავნის ახლო აღმოსავლეთში, ისრაელსა და ჰეზბოლას შორის დაპირისპირების ზრდის ფონზე ისრაელმა ლიბანის სამხრეთზე მასირებული შეტევა 19 სექტემბრის საღამოდან დაიწყო იმ დროს, როცა ჰეზბოლას ლიდერი ჰასან ნასრალა სიტყვით გამოდიოდა წინა ორი დღის განმავლობაში განვითარებული მოვლენების გამო. 17 და 18 სექტემბერს, ლიბანში ჰეზბოლას წევრებს მასობრივად აუფეთქდათ პორტატიული საკომ...