24 სექტემბერს გაეროს გენერალურ ასამბლეაზე აშშ-ის პრეზიდენტი ჯო ბაიდენი წარმოთქვამს სიტყვას, რომელიც მისი ბოლო, გამოსამშვიდობებელი, გამოსვლა იქნება ამ ფორუმზე. მოელიან, რომ ბაიდენი ილაპარაკებს ახლა აღმოსავლეთში, ღაზის სექტორსა და ლიბანში ისრაელის ომების და სუდანში 17-თვიანი სამოქალაქო შეიარაღებული კონფლიქტის დასრულების აუცილებლობაზე. აშშ-ის პრეზიდენტი, რომელიც საპრეზიდენტო არჩევნების შემდეგ თანამდებობას გადააბარებს კენჭისყრაში გამარჯვებულს, შეეხება ასევე აშშ-ის და მისი დასავლელი მოკავშირეების მხარდაჭერას უკრაინისადმი, რომელიც 2022 წლის თებერვლის შემდეგ ომს აწარმოებს მეზობელ რუსეთთან. ეს იქნება ბაიდენის ერთ-ერთი ბოლო გამოსვლა, როცა მას შესაძლებლობა მიეცემა, მოუწოდოს სახელმწიფოებს, აქტიურად დაუჭირონ მხარი უკრაინას. გაეროს გენერალურ ასამბლეაზე, 24 სექტემბრის დილის სესიაზე, ტრადიციისამებრ, ბაიდენი ბრაზილიის წარმომადგენლის შემდეგ გამოვა. უკრაინისთვის დასავლეთის მხარდაჭერა შეიძლება კითხვის ნიშნის ქვეშ დადგეს, თუ 5 ნოემბრის არჩევნებში დემოკრატ ვიცე-პრეზიდენტს, კამალა ჰარისს, დაამარცხებს რესპუბლიკური პარტიის წარმომადგენელი, აშშ-ის ყოფილი პრეზიდენტი დონალდ ტრამპი, რომელსაც უკრაინის ომის დასრულების თავისი გეგმა აქვს. უკრაინის პრეზიდენტი ვოლოდიმირ ზელენსკი, რომელიც გაეროს გენერალურ ასამბლეაზე სიტყვით 25 სექტემბერს გამოვა, მოითხოვს ბაიდენისგან, შეამსუბუქოს აკრძალვა, რომელიც კიევს დასავლეთის მიერ მიწოდებული შორი მოქმედების რაკეტების რუსეთის ტერიტორიის სიღრმეში გამოყენების საშუალებას არ აძლევს. ბაიდენი და ჰარისი ზელენსკის 24 სექტემბერს ხვდებიან ვაშინგტონში. ამ კვირაში დაგეგმილია ასევე უკრაინის პრეზიდენტის საუბარი დონალდ ტრამპთან. ...