აშშ-ის მოქალაქე, 58 წლის რაიან როუთი, რომელიც ეჭვმიტანილია აშშ-ის ყოფილ პრეზიდენტ, საპრეზიდენტო კანდიდატ დონალდ ტრამპზე თავდასხმის მცდელობაში, წინასწარ შექმნილ ჩანაწერში აღიარებს, რომ დაგეგმა თავდასხმა და იწინასწარმეტყველა კიდეც მისი წარუმატებლობა. ამის შესახებ ნათქვამია დოკუმენტში, რომელიც პროკურორებმა სასამართლოს გადასცეს. "ეს იყო დონალდ ტრამპის მკვლელობის მცდელობა, მაგრამ იმედი გაგიცრუეთ. მთელი ძალა მოვახმარე და მთელი ჩემი ჭკუა გამოვიყენე, რაც შემეძლო", - ნათქვამია ჩანაწერში, რომელიც როუთმა მეგობრის სახლში, ყუთში დატოვა. მასში ის 150 000 დოლარის ჯილდოს ჰპირდება მას, „ვისაც შეუძლია დაასრულოს ეს სამუშაო“. წერილში ნათქვამია, რომ ტრამპი არ არის აშშ-ის პრეზიდენტობისთვის შესაფერისი კანდიდატი. პროკურორების თქმით, ჩანაწერის გარდა, ყუთში ასევე იყო საბრძოლო მასალა და ლითონის მილი. ასევე ცნობილი გახდა, რომ როუთის მანქანის ჩხრეკისას პოლიციამ აღმოაჩინა „ხელით დაწერილი სია იმ ადგილებისა, სადაც 2024 წლის აგვისტოს, სექტემბერსა და ოქტომბერში ყოფილი პრეზიდენტი ან იმყოფებოდა, ან აპირებდა მისვლას”. გარდა ამისა, ნაპოვნია ექვსი მობილური ტელეფონი, რომელთაგან ერთში მომხმარებელს "გუგლის" საშუალებით მოძებნილი ჰქონდა გზა, როგორ უნდა წასულიყო მექსიკაში პალმ ბიჩის არეალიდან, სადაც სროლა იყო. საქმის განხილვისას, სხდომაზე 23 სექტემბერს პროკურორებმა მოსამართლეს სასამართლომდე როუთის პატიმრობაში დატოვება მოსთხოვეს. როუთს ამ დროისთვის ორი ბრალდება წაუყენეს: იარაღის უკანონო შეძენა-შენახვა, ცეცხლსასროლი იარაღის შენახვა ნასამართლები პირის მიერ და იარაღის შენახვა წაშლილი სერიული ნომრით. როგორც Reuters-ი აღნიშნავს, ამას შესაძლოა სხვა ბრალდებები დაემატოს. მოსამართლე რაიან მაკკეიბმა განაცხადა, რომ პროკურორებმა წარმოადგინეს საბუთი, რომ როუთი ტრამპს “უთვალთვალებდა” რამდენიმე თვის განმავალობაში ფლორიდის სამხრეთში და “აშკარად ცდილობდა მოეკლა ის.” სროლა 15 სექტემბერს მოხდა ფლორიდაში, პალმ ბიჩში, გოლფის მოედანთან, სადაც იმ მომენტში დონალდ ტრამპი იმყოფებოდა. მედიის თანახმად, როუთი ნასამართლები იყო. მან პრესას უთხრა, რომ ცდილობდა ავღანეთის არმიის ყოფილი ჯარისკაცების გადაბირებას უკრაინის შეიარაღებულ ძალებში სამსახურისთვის და რომ 2022 წელს რამდენიმე თვე უკრაინის ტერიტორიაზე გაატარა. ადგილობრივი შერიფის უწყების ცნობით, ის გოლფის მოედნის მახლობლად დაიმალა ბუჩქებში, მაგრამ საიდუმლო სამსახურის აგენტმა ბუჩქებში ავტომატის ლულა დაინახა და გამაფრთხილებლად გაისროლა. ამის შემდეგ ეჭვმიტანილი გაიქცა და დააკავეს მოწმეების დახმარებით, რომლებმაც დაინახეს, როგორ ჩაჯდა იგი მანქანაში. როუთმა მანქანით გაქცევა სცადა, მაგრამ მალევე დააკავეს. გისოსებიანი ღობის უკან, ბუჩქებში, რომლებიც გოლფის კლუბს გამოყოფ...