გაეროს გენერალურ ასამბლეაზე გამოსვლისას, გაეროს გენერალურმა მდივანმა ანტონიო გუტერეშმა ვითარებას მსოფლიოში „არამდგრადი“ უწოდა და გააფრთხილა შეკრებილი ლიდერები, რომ უსამართლობა, უთანასწორობა და განუსაზღვრელობა ქმნის „არამდგრად მსოფლიოს,“ რომელშიც სულ უფრო მეტი ქვეყანა თვლის, რომ „ციხიდან თავისუფლად გამოსვლის ბარათს“ ფლობს. „ამ სულისკვეთებით ვერ გავაგრძელებთ“, - თქვა გუტერეშმა გაეროს გენერალურ ასამბლეაზე პრეზიდენტების, პრემიერ-მინისტრებისა და სხვა ლიდერების გამოსვლების დაწყებისას. გუტერეში გეოპოლიტიკური უთანხმოების გაღრმავებას, უსასრულო ომებს, კლიმატის ცვლილებას, ბირთვულ და უახლეს იარაღს გულისხმობდა, როცა განაცხადა, რომ კაცობრიობა „მიემართება წარმოუდგენელი დენთის კასრისკენ, რომელიც მთელ მსოფლიოს შთანთქმის საფრთხეს უქმნის“. გაეროს გენერალური მდივანი მიიჩნევს, რომ „პრობლემები, რომლებსაც ვაწყდებით, შეიძლება მოგვარდეს“, თუ საერთაშორისო საზოგადოებრიობა წინ აღუდგება უმართავ საფრთხეებს, უთანასწორობას, რომელიც უსამართლობის საფუძველია და დაუსჯელობას, რომელიც ძირს უთხრის საერთაშორისო სამართალს და გაეროს ძირეულ პრინციპებს. დღეს სულ უფრო ბევრი მთავრობა და სხვა პირები თვლიან, რომ აქვთ უფლება, იქონიონ „ციხიდან გამოსვლის უფასო ბარათი“, - მოიხმო გუტურეშმა სამაგიდო თამაში „მონოპოლი“. გაეროს გენერალური ასამბლეა გაიხსნა ახლო აღმოსავლეთსა და უკრაინაში მიმდინარე ომების, ასევე სხვა არაერთი კონფლიქტის ფონზე. გენერალურ ასამბლეაზე სიტყვით გამოვლენ მსოფლიოს სახელმწიფოთა ლიდერები. აშშ-ის პრეზიდენტი ჯო ბაიდენი სიტყვას წარმოთქვამს 24 სექტემბერს. საქართველოს პრემიერის, ირაკლი კობახიძის გამოსვლა დაგეგმილია 25 სექტემბრის სესიაზე. ...