"არ ვუერთდები [არსებულ პარტიას], ჯერჯერობით პროცესშია და ხვალ გადაწყდება", - თქვა ქობულიამ. გადაცემის წამყვანმა მას ყოფილი პრემიერის, გიორგი გახარიას გუნდთან შესაძლო მიერთებაზე ჰკითხა, რაზეც ქობულიამ უპასუხა: "კომენტარს არ გავაკეთებ, სულ ერთი დღე დარჩა, გაიგებთ. ბევრი გუნდი არ არის, რომ დიდი გამოსაცნობი იყოს. წესებში რომ ჩავჯდეთ, სანამ არ გადაწყდება, მე კომენტარს არ ვაკეთებ. აქტიურად მიდის განხილვა". გიორგი ქობულიას აზრით, "ქართული ოცნების" საპატიო თავმჯდომარე ბიძინა ივანიშვილი დავალებებს რუსეთიდან არ იღებს და მისი ნაბიჯები "არასწორი მსოფლმხედველობის შედეგია". ქობულიას თქმითვე, პოლიტიკური გუნდი, რომელსაც შეუერთდება, იზიარებს მის ამ ხედვებს: "შეიძლება გუნდში არის სხვადასხვა პოზიცია, მაგრამ მეტწილად იზიარებენ. ჩვენ ვიზიარებთ იმ პოზიციას, რომ აუცილებლად აღვადგინოთ ჩვენი ვექტორი დასავლეთთან". გიორგი ქობულია საქართველოს ეკონომიკისა და მდგრადი განვითარების მინისტრის თანამდებობას იკავებდა 2018 წლის ივლისიდან 2019 წლის 19 აპრილამდე. ასევე ნახეთ გიორგი ქობულია: არაერთხელ მიწოდეს „უცხო სხეული“ მინისტრის თანამდებობიდან გათავისუფლების მიზეზებზე საუბრისას მან განაცხადა, რომ ხელისუფლების წარმომადგენლებთან დისკუსიის დროს არაერთხელ უწოდეს „უცხო სხეული“, განსხვავებული ხედვების გამო. საქართველოში საპარლამენტო არჩევნები 26 ოქტომბერს გაიმართება. დეპუტატებს მხოლოდ პროპორციული სისტემით აირჩევენ. პარლამენტის წევრთა მანდატები განაწილდება იმ პოლიტიკურ პარტიებზე, რომლებიც 5%-იან ბარიერს გადალახავენ. საპარლამენტო არჩევნებისთვის პარტიების ბლოკებად გაერთიანება აკრძალულია, ერთადერთი გზა არჩევნებში ერთად მონაწილეობისთვის არის საერთო საარჩევნო სიის შექმნა. საარჩევნო სიაში შეიძლება აღმოჩნდეს მხოლოდ არჩევნებში მონაწილე პარტიის წევრი, ანდა უპარტიო პოლიტიკოსი. ...