სულ მცირე, ერთი ადამიანი დაიღუპა უკრაინის სუმის ოლქზე რუსეთის ავიადარტყმების შედეგად. ადგილობრივი ხელისუფლების ინფორმაციით, საოკუპაციო ძალებმა რეგიონს მართვადი საავიაციო ბომბებით და დრონებით შეუტიეს. დაზიანებულია სამოქალაქო ინფრასტრუქტურის ობიექტები. სუმის ოლქი ესაზღვრება რუსეთის კურსკის ოლქს, სადაც უკრაინის შეიარაღებულმა ძალებმა აგვისტოდან დაიწყეს სახმელეთო ოპერაცია. უკრაინის საჰაერო ძალების მიერ დღეს, 25 სექტემბერს, დილით გამოქვეყნებული მონაცემებით, ღამის განმავლობაში მოწინააღმდეგემ ხარკოვის და ოდესის ოლქებს შეუტია რვა, მათ შორის ერთი საზენიტო-მართვადი და ოთხი საავიაციო რაკეტით. საჰაერო ძალების ცნობითვე, საოკუპაციო ძალებმა გამოიყენეს 32 უპილოტო საფრენი აპარატიც. უკრაინელი სამხედროების თანახმად, თავდაცვის ძალებმა 28 დრონი და 4 რაკეტა ჩამოაგდეს. საჰაერო თავდაცვის სისტემა ამოქმედებული იყო დნეპროპეტროვსკის, ხარკოვის, კიევის, ჩერკასის, კიროვოგრადის, სუმის, პოლტავის, ნიკოლაევის, ოდესისა და ხერსონის ოლქებში. ასევე ნახეთ ზელენსკი გაეროს უშიშროების საბჭოში: მხოლოდ იძულებით შეიძლება მშვიდობაზე რუსეთი დაითანხმო 24 სექტემბერს, საღამოს რუსეთის სამხედრო ძალებმა დაბომბეს ქალაქი ზაპოროჟიეც, სადაც ადგილობრივი ხელისუფლების ცნობით, შვიდი ადამიანი დაიჭრა. ქალაქის ერთ-ერთ რაიონში დაზიანებულია კერძო სახლები. 24 სექტემბერს, დღისით დაიბომბა ქალაქი ხარკოვიც, სადაც, სულ მცირე, 3 ადამიანი დაიღუპა და 31 დაშავდა. აფეთქებამ 9-სართულიანი სახლის ნაწილის ნგრევა გამოიწვია. ...