საქართველოს ეროვნული ბანკის(სების) პრესცენტრი იუწყება, რომ ნათია თურნავა ჩინეთის ელჩს შეხვდა და, სხვა საკითხებთან ერთად, ისაუბრა „ქვეყნებს შორის გადახდების სისტემების განვითარებასა“ და „ოპერაციების დივერსიფიკაციაზე“. რადიო თავისუფლება დაუკავშირდა ეროვნული ბანკის პრესცენტრს კითხვით, რა იგულისხმება ჩინეთის ელჩთან განხილულ „ოპერაციების დივერსიფიკაციაში“. ინფორმაცია პასუხის მიღების შემთხვევაში განახლდება. ასევე, ნათია თურნავამ განაცხადა, რომ „პროცესების დაჩქარების მიზნით“, სების წარმომადგენლები მომავალში ჩინეთის ცენტრალური ბანკის წარმომადგენლებთან გამართავენ შეხვედრებს. სების პრესცენტრის 25 სექტემბრის განცხადების თანახმად, ეროვნული ბანკის პრეზიდენტის მოვალეობის შემსრულებლის, ნათია თურნავას და საქართველოში ჩინეთის სახალხო რესპუბლიკის ელჩის, ჭოუ ციენის შეხვედრაზე მხარეებმა „ხაზი გაუსვეს საქართველოს ეროვნულ ბანკსა და ჩინეთს შორის არსებულ მჭიდრო თანამშრომლობას“. პრესრელიზის თანახმად, „ყურადღება გამახვილდა ქვეყნებს შორის გადახდების სისტემებისა და ფინანსური სერვისების განვითარების კუთხით სამომავლო თანამშრომლობის გააქტიურებაზე“. три ეროვნული ბანკის თანახმად, შეხვედრაზე „აღინიშნა, რომ საქართველოს ეროვნული ბანკი მუდმივად ისწრაფვის პროცესების გაუმჯობესებისკენ და ოპერაციების დივერსიფიკაციისკენ, რა მიზნითაც აქტიურად თანამშრომლობს სხვადასხვა ქვეყნის ცენტრალურ ბანკებთან“. სების ცნობითვე, შეხვედრის დასრულების შემდეგ ნათია თურნავამ თქვა, რომ „თანამშრომლობის გაღრმავების, ორივე ქვეყნისთვის აქტუალური საკითხების განხილვისა და პროცესების დაჩქარების მიზნით, ეროვნული ბანკის წარმომადგენლები მომავალში ჩინეთის ცენტრალური ბანკის წარმომადგენლებთან გამართავენ შეხვედრებს“. ჩინეთის ცენტრალური ბანკი (ჩინეთის სახალხო ბანკი) მნიშვნელოვან როლს ასრულებს ჩინეთის გლობალური „სარტყლისა და გზის“ ინიციატივაში, რომლის ნაწილიც საქართველოც ხდება ანაკლიის ღრმაწყლოვანი პორტის მშენებლობაში ჩინეთის სახელმწიფოს 50%-იანი თანამონაწილეობით. ასევე ნახეთ ანაკლიის სანქცირებული ინვესტორი: რას ნიშნავს ჩინეთის სახელმწიფო კომპანიის სტრატეგიულ პროექტში ჩართვა ეროვნულ ბანკში ელჩ ჭოუ ციენთან შეხვედრას ასევე ესწრებოდნენ ეროვნული ბანკის ვიცე-პრეზიდენტი ეკატერინე გალდავა, ფინანსური ბაზრების დეპარტამენტის ხელმძღვანელი ალექსანდრე ხაზარაძე და საერთაშორისო ურთიერთობების დეპარტამენტის ხელმძღვანელი გიორგი ედილაშვილი. ასევე ნახეთ საქართველომ ჩინეთის მოკავშირე კამბოჯასთან დედოლარიზაციაზე მემორანდუმი გააფორმა - რას ნიშნავს ეს? საქართველომ და ჩინეთმა 2023 წლის 31 ივლისს სტრატეგიული პარტნიორობის დამყარება გამოაცხადეს. ...