ევროპის საბჭოს საპარლამენტო ასამბლეის წინასაარჩევნო დელეგაციის ხელმძღვანელი იულიან ბულაი, რომელიც საქართველოში გამართულ წინასაარჩევნო ვიზიტს აფასებს, აცხადებს, რომ თავისუფალი და ლეგიტიმური არჩევნები აუცილებელია ევროპაში საქართველოს ადგილის დასაცავად. ევროპის საბჭოს საპარლამენტო ასამბლეის წინასაარჩევნო დელეგაციამ, რომელიც 23-24 სექტემბერს ორდღიანი ვიზიტით იმყოფებოდა საქართველოში, შემაჯამებელი კრიტიკული მოსაზრება გამოაქვეყნა. „ჩვენი დელეგაცია შეშფოთებულია, რომ პოლიტიკური ლანდშაფტის პოლარიზაციამ უპრეცედენტო დონეს მიაღწია, რაც მომავალ საპარლამენტო არჩევნებს საქართველოს დემოკრატიის ტრაექტორიაზე დე ფაქტო რეფერენდუმად აქცევს. ვიზიარებ დელეგაციასთან შეხვედრებში მონაწილე პირების წუხილს დემონსტრაციების დარბევასთან და განსხვავებული აზრის გამოხატვის დევნასთან დაკავშირებით, ვიანიდან დემონსტრაციებიც და განსხვავებული აზის გამოხატვაც სრულიად ლეგიტიმურია დემოკრატიულ საზოგადოებაში. ხელისუფლებას მოეთხოვება ადამიანის უფლებების სტანდარტების შესაბამისად მოქმედება, არაპროპორციული ძალის გამოყენებისგან თავშეკავება და ძალადობის შემთხვევების დროული და სიღრმისეული გამოძიება“, - განაცხადა იულიან ბულაიმ. მისივე თქმით, ასევე შემაშფოთებელია ოპოზიციის წევრების შესაძლო შევიწროების ფაქტები, "ისევე როგორც მუქარა, დაშინება და სიძულვილის ენა სამოქალაქო საზოგადოებისა და მედიის წარმომადგენლების მისამართით". ევროპის საბჭოს საპარლამენტო ასამბლეის წინასაარჩევნო დელეგაციის ხელმძღვანელი შესაბამის უწყებებს მოუწოდებს, სრულყოფილად და გამჭვირვალედ გამოიძიონ ეს ბრალდებები. ის გამოხატავს შეშფოთებას "აგენტების კანონის" მიღების გამო და მის უარყოფით ზეგავლენაზე სამოქალაქო საზოგადოების მიმართ. ასევე საუბრობს ანტიკორუფციული ბიუროს გადაწყვეტილებაზე, რომელიც „გაცხადებული საარჩევნო მიზნის მქონე სუბიექტებად“ განიხილავს სამოქალაქო საზოგადოების ორგანიზაციებს. "შეშფოთებული ვარ არჩევნების წინ უცხოური გავლენის გამჭვირვალობის შესახებ კანონის მსუსხავი ზეგავლენით აქტივისტებსა და არჩევნების შიდა დამკვირვებლებზე და ვიმეორებ ასამბლეის მოწოდებას კანონის გაწვევასთან დაკავშირებით, რომელიც შეუსაბამოა ევროპული დემოკრატიისა და ადამიანის უფლებების სტანდარტებთან. მოვუწოდებ ხელისუფლების წევრებს, გამოავლინონ მაქსიმალური თავშეკავება - ვიცით, რომ ამჟამად საკონსტიტუციო სასამართლო განიხილავს ამ კანონს. ამასთან დაკავშირებით, გვაშფოთებს არასამთავრობო ორგანიზაციების „გაცხადებული საარჩევნო მიზნის მქონე სუბიექტებად“ გამოცხადების შესახებ გადაწყვეტილება, რომელთაც ეკისრებათ იგივე ფინანსური ზედამხედველობა და შეზღუდვები, როგორიც პოლიტიკურ პარტიებს, რასაც აგრეთვე აქვს მსუსხავი ეფექტი“, - აცხადებს იულიან ბულაი. ის კრიტიკულად ...