ამერიკის დაზვერვა მიიჩნევს, რომ რუსეთი, სავარაუდოდ, მკაცრ საპასუხო ზომას მიმართავს, თუ აშშ და მისი მოკავშირეები უფლებას მისცემენ უკრაინას, განახორციელოს დასავლეთის იარაღით დარტყმები რუსეთის სიღრმეში. ამის შესახებ გაზეთი „ნიუ-იორკ ტაიმსი“ წერს ამერიკელ მოხელეებზე დაყრდნობით. აშშ-ის დაზვერვის შეფასებაში აღწერილია რამდენიმე შესაძლო საპასუხო ზომა რუსეთის მხრიდან: ევროპაში დივერსიული აქტების ორგანიზებით, მათ შორის ცეცხლის წაკიდებით დაწყებული და ამერიკულ და ევროპულ სამხედრო ბაზებზე გამანადგურებელი თავდასხმებით დამთავრებული. გარდა ამისა, აღნიშნულია, რომ რუსეთის სიღრმეში დარტყმის ნებართვა ვერ შეძლებს მკვეთრად იმოქმედოს უკრაინაში ომის მიმდინარეობაზე, რადგან ამ დროისთვის უკრაინას აქვს შეზღუდული რაოდენობის გრძელ მანძილზე მოქმედების რაკეტები. ასევე გაურკვეველია, თუ კიდევ რამდენი ასეთი იარაღის მიწოდებას შეძლებენ კიევისათვის დასავლელი მოკავშირეები. აშშ-ის დაზვერვის წარმომადგენლები მიიჩნევენ, რომ პირველი ასეთი დარტყმების შემდეგ, რუსეთი, სავარაუდოდ, საბრძოლო მასალის საწყობებს, სამეთაურო პუნქტებს, მოიერიშე შვეულმფრენებს და სხვა მნიშვნელოვან ობიექტებს სარაკეტო ზემოქმედების დიაპაზონის მიღმა გადაიტანს. გამოცემა „ნიუ-იორკ ტაიმსი“ აღნიშნავს, რომ თეთრ სახლს ჯერ არ გაუკეთებია კომენტარი აშშ-ის დაზვერვის შეფასებაზე. უკრაინის პრეზიდენტმა ვოლოდიმირ ზელენსკიმ არაერთხელ მოუწოდა დასავლეთის ქვეყნებს, გააუქმონ აქამდე მოქმედი შეზღუდვა გრძელი მოქმედების იარაღის რუსეთის სიღრმეში გამოყენებაზე. საუბარია 300 კილომეტრამდე ფრენის სიშორის ამერიკულ ATACMS-ის რაკეტებზე და ანგლო-ფრანგულ Storm Shadow რაკეტებზე, 560 კილომეტრამდე მოქმედების რადიუსით, რომელთა გამოყენებაც რუსეთის ტერიტორიის სიღრმეში, უკრაინის ხელისუფლების აზრით, დააჩქარებს უკრაინის გამარჯვებას. პუტინმა უკვე გააფრთხილა კოლექტიური დასავლეთი, რომ კიევისთვის რუსეთის ტერიტორიაზე გრძელი რადიუსის იარაღით დარტყმის უფლების მიცემა ნიშნავს ნატოს ქვეყნებისა და ევროპული სახელმწიფოების უშუალო მონაწილეობას უკრაინის ომში. ასეთ შემთხვევაში, პუტინის თანახმად, „რუსეთი იძულებული იქნება, ამგვარად წარმოქმნილი საფრთხეებიდან გამომდინარე მიიღოს გადაწყვეტილებები“. ასევე ნახეთ პუტინი: დასავლეთის პირდაპირი მონაწილეობა ცვლის უკრაინაში კონფლიქტის არსს ასევე ნახეთ მედვედევი კიევს ბირთვული იარაღით დაემუქრა რუსეთის ტერიტორიის სიღრმეში დარტყმების აკრძალვის შემთხვევაში ...