ანალიტიკურ ცენტრ DeepState-ის თანახმად, რუსეთის საოკუპაციო ძალებმა 26 სექტემბრის მონაცემებით მოახერხეს წინსვლა დონეცკის ოლქის 4 დასახლებული პუნქტის: უგლედარის, ნიკოლაევკის, კრუტოი იარისა და კრასნი იარის მიმართულებით. რადიო თავისუფლების უკრაინული სამსახურის ცნობით, საბრძოლო მოქმედებათა რუკის მიხედვით, აგრესორს ორი კილომეტრი აშორებს პოკროვსკის რაიონის ქალაქ მირნოგრადს. ამგვარი განვითარებით, ქალაქი უგლედარი დასავლეთიდან და აღმოსავლეთიდან რუსეთის არმიის პოზიციებს შორის არის მჭიდროდ გახიდული, ხოლო ჩრდილოეთით ქალაქთან დამაკავშირებელი ერთადერთი ტრასა, რუსეთის არმიის საცეცხლე კონტროლის ქვეშ არის მოქცეული. ქალაქის გარშემო შექმნილ ვითარებას ანალიტიკოსები წინა დღეებშიც აფასებდნენ, როგორც კრიტიკულს და აღნიშნავდნენ, რომ რუსეთის არმიამ აქ ნახევრად ალყაში მოაქცია უკრაინის 72-ე ცალკეული მექანიზებული ბრიგადის პოზიცია. სიტუაციის კრიტიკულობა, DeepState-ის ანალიტიკოსების შეფასებით, გამოწვეულია სწორედ იმით, რომ აღნიშნული ბრიგადა ამ მიმართულებაზე როტაციის გარეშე უკვე ორ წელზე მეტხანს იბრძვის. 26 სექტემბერს უკრაინის შეიარაღებული ძალების 72-ე ცალკეული მექანიზებული ბრიგადის სამხედრო მოსამსახურეებმა განაცხადეს, რომ ისინი აგრძელებენ უგლედარის დაცვას და უარყვეს ინფორმაცია ქალაქიდან თავდაცვის ძალების გაყვანის შესახებ. ასევე ნახეთ უკრაინაში აცხადებენ, რომ არ აპირებენ ქალაქ უგლედარის დატოვებას ...