მაჰაჩყალაში, 27 სექტემბერს ბენზინგასამართ სადგურზე მომხდარი აფეთქების შედეგად დაღუპულთა რიცხვი 13-მდე გაიზარდა, - იუწყება რუსეთის საგანგებო სიტუაციების სამინისტრო, რომლის ცნობითვე, დაშავდა 23 ადამიანი. სავარაუდოდ, დაღუპულთა შორისაა ექვსი და რვა წლის ორი ბავშვი. გარდაცვლილთა სია გამოაქვეყნა Telegram-არხმა Mash Gor. „დაღესტნის ოთხი მკვიდრი დღემდე რჩება საავადმყოფოში, მათი მდგომარეობა საშუალო სიმძიმისაა“, - იტყობინება დაღესტნის რესპუბლიკის ჯანდაცვის სამინისტრო. რუსეთის ფედერალურ გზატკეცილ „კავკასიაზე“, სოფელ ახალი ხუშეთის მახლობლად მდებარე ბენზინგასამართ სადგურ „Plus“-ზე ორი აფეთქება მოხდა 27 სექტემბერს, ადგილობრივი დროით 17:30 საათზე. დაუდასტურებელი ინფორმაციით, მიზეზი შესაძლოა ყოფილიყო ბენზინის აალება. მეხანძრეები ცეცხლს ოთხი საათის განმავლობაში აქრობდნენ. რუსეთის საგამოძიებო კომიტეტმა სისხლის სამართლის აღძრა უსაფრთხოების მოთხოვნებთან შეუსაბამო მომსახურების გაწევის გამო ორი ან მეტი ადამიანის გარდაცვალების ფაქტზე. რადიო თავისუფლების ჩრდილოკავკასიური სამსახურის ცნობით, ბოლო ერთი წლის განმავლობაში დაღესტანში რიგით მეორე მასშტაბური აფეთქება მოხდა ბენზინგასამართ სადგურზე: 2023 წლის 14 აგვისტოს, სოფელ კარმან-2-ში მომხდარმა აფეთქებამ 35 ადამიანის, მათ შორის სამი ბავშვის სიცოცხლე შეიწირა. რუსეთის საგამოძიებო კომიტეტის ინფორმაციით, მასშტაბური აფეთქების მიზეზი გახდა საწყობში შენახული ამონიუმის გვარჯილა. ძლიერად აალებადი სასუქები ინახებოდა ტექნიკური მომსახურებისა და ბენზინგასამართი სადგურების მიმდებარე შენობაში. ...