ახლო აღმოსავლეთში მზარდი დაძაბულობის ფონზე, კრემლი აცხადებს, რომ პრემიერ-მინისტრი მიხეილ მიშუსტინი 30 სექტემბერს თეირანში ჩავა და ირანის პრეზიდენტთან, მასუდ ფეზეშქიანთან გამართავს შეხვედრას. მოსკოვმა დაგმო ისრაელის თავდასხმები ირანის მიერ მხარდაჭერილ ჰეზბოლაზე ლიბანში. ჰეზბოლა გასამხედროებული ჯგუფი და პოლიტიკური პარტიაა, რომელიც სამხრეთ ლიბანის დიდ ნაწილს აკონტროლებს. ჰეზბოლას შეერთებული შტატები ტერორისტულ ორგანიზაციად მიიჩნევს, ევროკავშირს მხოლოდ მისი შეიარაღებული დაჯგუფება ჰყავს შეყვანილი შავ სიაში. ორგანიზაციის ლიდერი ჰასან ნასრალა ისრაელის მიერ ბეირუთზე მიტანილი შეტევის შედეგად 27 სექტემბერს მოკლეს. დასავლეთის ხელისუფლებები თეირანს ადანაშაულებენ რუსეთისთვის იარაღის, განსაკუთრებით დრონების მიწოდებაში - მათ რუსეთი უკრაინაში წარმოებულ ომში იყენებს. პრემიერ-მინისტრის სტატუსის მიუხედავად, მიშუსტინს მცირე ძალაუფლება აქვს რუსეთში, სადაც დომინანტურ ფიგურას პრეზიდენტი ვლადიმირ პუტინი წარმოადგენს. თუმცა ახლო აღმოსავლეთში გაზრდილი დაძაბულობის პირობებში, ირანში მისი ვიზიტი შესაძლოა აღქმული იყოს ირანისთვის მხარდაჭერის გამოცხადებად. ასევე ნახეთ ანალიტიკოსები: ნასრალას სიკვდილი დიდი დანაკარგია ჰეზბოლასთვის და ირანისთვის ...