ისრაელმა 30 სექტემბერს დარტყმა განახორციელა ბეირუთის ცენტრალურ უბანზე. ინფორმაციას AFP ავრცელებს ლიბანის უშიშროების სამსახურის წყაროზე დაყრდნობით. წყაროს მონაცემებით, ისრაელის დრონით იერიში განხორციელდა მრავალსართულიან საცხოვრებელ კორპუსში მდებარე ბინაზე, რომელიც ეკუთვნის ჰეზბოლასთან დაკავშირებული სუნიტური დაჯგუფების, „ალ ჯამაა ალ-ისლამის“ წარმომადგენელს. მიიჩნევენ, რომ დაჯგუფებამ მნიშვნელოვანი როლი ითამაშა მოძრაობა ჰეზბოლასა და ისრაელის მიმდინარე დაპირისპირებაში, - წერს АР. შემთხვევის ადგილზე გადაღებულ ვიდეოში ჩანს, რომ დანგრეულია მრავალსართულიანი შენობის ერთი სართული, აფეთქების შემდეგ ადგილზე გაჩნდა ხანძარი. AFP-ს წყაროს ცნობით, თავდასხმის შედეგად დაიღუპა 4 ადამიანი, 16 კი დაშავდა. მოგვიანებით „პალესტინის გათავისუფლების ეროვნულ ფრონტში“ განაცხადეს, რომ ბეირუთზე თავდასხმისას დაიღუპა მათი სამი ლიდერი. AFP-ს მონაცემებით, მოკლულებს შორისაა "პალესტინის გათავისუფლების ეროვნული ფრონტის“ უშიშრების სამსახურის ხელმძღვანელი მოჰამედ აბდელ-აალი. მომხდარზე კომენტარი ჯერჯერობით არ გაუკეთებია ისრაელის თავდაცვის უწყებას. ახლო აღმოსავლეთში კონფლიქტის მიმდინარე ესკალაციისას, ბოლო ერთი წლის განმავლობაში, შარშან ისრაელზე ტერორისტული ორგანიზაცია ჰამასის ფართომასშტაბიანი თავდასხმის შემდეგ, ეს პირველი თავდასხმაა ბეირუთის ცენტრზე. მანამდე ისრაელს იერიში ძირითადად მიჰქონდა ჰეზბოლას იმ ობიექტებზე, რომლებიც ბეირუთის სამხრეთ გარეუბანში იყო განთავსებული. 30 სექტემბრის ღამეს, ისრაელის შეიარაღებულმა ძალებმა განაცხადეს, რომ საჰაერო იერიშების სერია განხორციელდა ჰეზბოლას სამიზნეებზე ლიბანის აღმოსავლეთ და სამხრეთ ნაწილებში. ისრაელის არმიის ცნობით, განადგურებულ სამიზნეებს შორის იყო სარაკეტო მოწყობილობები და იარაღის საწყობები. ...