ისრაელის არმიამ ლიბანის სამხრეთში სახმელეთო ოპერაცია დაიწყო ჰეზბოლას წინააღმდეგ. ისრაელის თავდაცვის არმიის მიერ გვიან ღამით გამოქვეყნებული განცხადების მიხედვით, ჰეზბოლას „ტერორისტული ობიექტების და ინფრასტრუქტურის“ წინააღმდეგ დაწყებულია „შეზღუდული, ლოკალიზებული და მიზნობრივი რეიდი“. ჰეზბოლა წარმოადგენს როგორც გასამხედროებულ ჯგუფს, ისე პოლიტიკურ პარტიას და ლიბანის სამხრეთში აკონტროლებს შიიტებით დასახლებული რაიონების დიდ ნაწილს. ისრაელის არმიის თანახმად, სამიზნედ გამოცხადებული ჰეზბოლას ობიექტები მდებარეობს საზღვრის მახლობლად და უშუალო საფრთხეს წარმოადგენს ისრაელის ჩრდილოეთისთვის. ისრაელის თავდაცვის არმიის ინფორმაციით, სახმელეთო ჯარებს ზუსტი დარტყმებით ეხმარებიან ავიაცია და არტილერია. ისრაელის გარდა, ჰეზბოლა ტერორისტულ ორგანიზაციად ჰყავს გამოცხადებული აშშ-ს. ევროკავშირი ტერორისტულად ცნობს მხოლოდ ჰეზბოლას გასამხედროებულ ფრთას. ისრაელის ხელისუფლებამ აშშ-ს წინასწარ აცნობა, რომ ლიბანის სამხრეთში, ჰეზბოლას ობიექტების წინააღმდეგ ჩაატარებს „შეზღუდულ“ სახმელეთო ოპერაციას. პირველი ცნობები, რომ ისრაელის არმიის ტანკები უკვე ლიბანის სამხრეთში არიან, 30 სექტემბერს, საღამოს გაავრცელეს არაბულმა ტელეარხებმა Al Arabiya-მ და Al Hadath-მა. სახმელეთო ოპერაციის დაწყებამდე ისრაელის არმიამ ქვეყნის ჩრდილოეთში მდებარე რამდენიმე დასახლებული პუნქტი დახურულ სამხედრო ზონად გამოაცხადა. ასევე ნახეთ ჰეზბოლა ადასტურებს ნასრალას სიკვდილს ისრაელის თავდასხმის შედეგად სახმელეთო ოპერაციამდე ისრაელის არმიის ავიაცია ლიბანში ჰეზბოლას ობიექტებს ინტენსიურად ბომბავდა სექტემბრის ბოლო ერთი კვირის განმავლობაშიც. 27 სექტემბერს ბეირუთზე შეტევის შედეგად მოკლეს ორგანიზაციის ლიდერი ჰასან ნასრალა. ლიბანის მთავრობის მონაცემებით, ისრაელის ავიადარტყმების შედეგად დაღუპულია 1000-ზე მეტი ადამიანი და იძულებით გადაადგილებულია დაახლოებით ერთი მილიონი. ასევე ნახეთ ირანი აცხადებს, რომ სამხედროებს არ გაგზავნის ისრაელის წინააღმდეგ საბრძოლველად, ლიბანში თავდასხმების გაძლიერების ფონზე ჰეზბოლა პალესტინელთა რადიკალური ისლამისტური მოძრაობა ჰამასის მხარდამჭერია. ორივე მათგანს მხარს უჭერს ირანის ისლამური რესპუბლიკის ხელისუფლება. 2023 წლის ოქტომბრიდან, როცა ისრაელმა თავის ტერიტორიაზე თავდასხმის, ათასზე მეტი ადამიანის დახოცვისა და მძევლად აყვანის შემდეგ ომი გამოუცხადა პალესტინელთა რადიკალურ ისლამისტურ მოძრაობა ჰამასს და ღაზის სექტორში დიდი მსხვერპლის და ჰუმანიტარული კატასტროფის გამომწვევი სამხედრო ოპერაცია დაიწყო, ჰეზბოლამ ლიბანის სამხრეთიდან ისრაელის ჩრდილოეთზე არაერთხელ მიიტანა სარაკეტო შეტევა, რასაც ისრაელის დარტყმები მოჰყვა. 2024 წლის 17 და 18 სექტემბერს, ლიბანში ჰეზბოლას წევრებს მასობრივად...