1 ოქტომბერს უკრაინა აღნიშნავს "მცველთა დღეს", იმ ფონზე, როცა რუსეთი კვლავ უტევს დრონებით და სულ უფრო მეტად რთულდება საბრძოლო ვითარება სამხრეთში, სადაც რუსეთს მცირედი წინსვლა აქვს. ადგილობრივი დროით დილის 9 საათზე, მთელი ქვეყნის მასშტაბით დაიცვეს წუთიერი დუმილი, რომლითაც პატივი მიაგეს ქვეყნის დამოუკიდებლობისთვის დაღუპულ ყველა უკრაინელს. ტელეგრამით გავრცელებულ ტექსტში უკრაინის არმიის მთავარსარდალმა, გენერალმა ოლექსანდრ სირსკიმ "მცველთა დღე" მიულოცა უკრაინელ ჯარისკაცებს, რომლებსაც "დაუმარცხებელი მებრძოლები" უწოდა. სირსკის თქმით, უკრაინელი სამხედროები დაუპირისპირდნენ ქვეყანაში შეჭრილ რუსეთის ძალებს, ბოლო ორწლინახევრის განმავლობაში "შეებრძოლნენ ე.წ. "მსოფლიოს მეორე არმიას" და შეაჩერეს. განცხადება გაავრცელა თავდაცვის მინისტრმა რუსტემ უმეროვმაც. მან ყველა უკრაინელ სამხედროს მადლობა გადაუხადა ერთიანობისთვის, სიმამაცისა და გამძლეობისთვის. "ჩვენ ვიცით, რისთვისაც ვიბრძვით - ჩვენი სახლისთვის, ჩვენი ნათესავებისთვის, რომლებიც მშვიდობიან ცაზე ოცნებობენ. ქალაქებისთვის და სოფლებისთვის, რომლებიც გათავისუფლებას ელიან. მომავალი თაობებისთვის, რომლებიც თავიანთ მიწაზე შიშის გარეშე იცხოვრებენ. და მათი ხსოვნისთვის, ვინც საუკუნეების განმავლობაში სიცოცხლე შესწირა ჩვენს თავისუფლებას", - თქვა უმეროვმა. 1 ოქტომბერი "მცველთა დღედ" უკრაინაში გამოცხადდა 2014 წელს - რამდენიმე თვეში მას მერე, რაც რუსეთმა უკრაინის ყირიმის ნახევარკუნძულისა და დონეცკისა და ლუგანსკის რეგიონების ნაწილების უკანონო ოკუპაცია განახორციელა. ამ დღით ჩანაცვლდა საბჭოთა კავშირის პერიოდში შემოღებული "სამშობლოს დამცველის დღე", რომელიც 23 თებერვალს აღინიშნებოდა. ასევე ნახეთ კიევში აცხადებენ, რომ რუსეთის სიღრმეში დარტყმის ნებართვის შესახებ პირველები რუსები შეიტყობენ რუსეთი განაგრძობს დრონებით შეტევებს უკრაინის წინააღმდეგ. უკრაინის საჰაერო ძალებმა 1 ოქტომბრის დილას ჩამოაგდეს 29 დრონი 32-დან, რომლებიც რუსეთმა გაუშვა უკრაინის შვიდი რეგიონისკენ, - აცხადებს უკრაინის საჰაერო თავდაცვა ტელეგრამით. ასევე ნახეთ სატელიტური ფოტოები ადასტურებს რუსული საბრძოლო მასალების მასშტაბურ აფეთქებებს ...