ნეპალში წყალდიდობისა და მეწყრის შედეგად დაღუპულთა რიცხვი 217 ადამიანამდე გაიზარდა. სტიქიამ, რომელიც ხუთშაბათს, 26 სექტემბერს დაიწყო, ბევრ პროვინციაში გაანადგურა საცხოვრებელი სახლები, რის გამოც ათასობით ადამიანი უსახლკაროდ დარჩა. პარასკევიდან მოყოლებული აღმოსავლეთ და ცენტრალური ნეპალის დიდი ტერიტორიები დაიტბორა. თუმცა, დედაქალაქ კატმანდუში კვირიდან ამინდმა გაუმჯობესება დაიწყო. 1 ოქტომბერს, სამშაბათს დილით, კატმანდუსა და ნეპალის სხვადასხვა ნაწილში სამდღიანი უწყვეტი წვიმის შედეგად გამოწვეული წყალდიდობისა და მეწყერის შედეგად დაღუპულთა რიცხვმა 217 ადამიანს მიაღწია. შინაგან საქმეთა სამინისტროს სპიკერის, რეშირამ ტივარის განცხადებით, ამ დროისთვის სტიქიასთან დაკავშირებული ინციდენტების გამო 28 ადამიანი უგზო-უკვლოდ დაკარგულია და 143-ი დაშავდა. სამდღიანი უწყვეტი წვიმების შედეგად ყველაზე მეტად დაზარალდა კატმანდუს ხეობა, სადაც დაღუპულთა რიცხვმა 50 ადამიანს გადააჭარბა. ნეპალში წვიმიანი სეზონი ივნისში დაიწყო. ეს ჩვეულებრივ მთავრდება სექტემბრის შუა რიცხვებში. ნეპალში თითქმის ყოველწლიურად ხდება წყალდიდობა და მეწყერი. თუმცა, მათი მასშტაბი ბოლო წლებში გაიზარდა. მეცნიერები ამას გლობალურ დათბობას უკავშირებენ, რაც იწვევს მსოფლიო ოკეანეებში წყლის უფრო ინტენსიურად აორთქლებას, ჰაერი უფრო ნოტიო ხდება და მატულობს ნალექი. ასევე ნახეთ ნეპალში მეწყრის გამო მდინარეში ჩავარდა ავტობუსები, რომლებშიც ათობით ადამიანი იყო ...