რუსეთის რამდენიმე რეგიონზე უპილოტო საფრენი აპარატებით მორიგი შეტევა იყო. თავდაცვის სამინისტროს მიერ დღეს, 3 ოქტომბერს, დილით გამოქვეყნებული მონაცემებით, ღამის განმავლობაში საჰაერო თავდაცვის ძალებმა გაანადგურეს 113 უკრაინული დრონი, მათ შორის 73 ბელგოროდის ოლქში, 25 - ვორონეჟში, 14 - კურსკის ოლქში და 1 - ბრიანსკში. ხმელეთზე შედეგების შესახებ რუსეთის თავდაცვის სამინისტრო არაფერს იუწყება. ვორონეჟის ოლქის გუბერნატორ ალექსანდრ გუსევის ტელეგრამ-არხზე დილით გამოქვეყნებული ცნობით, დაზიანებულია ოთხი კერძო სახლი. დღეს დილით, ბელგოროდის ოლქის გუბერნატორმა ვიაჩესლავ გლადკოვმა განაცხადა, რომ გუშინ, 2 ოქტომბერს, უკრაინის შეიარაღებული ძალების მხრიდან შეტევის შედეგად 4 მშვიდობიანი მოქალაქე დაიღუპა და 24 დაიჭრა. რა ტიპის შეტევა იყო, გლადკოვს არ დაუკონკრეტებია. უკრაინის თავდაცვის ძალები რუსეთის ამ რეგიონს, საიდანაც უკრაინა ინტენსიურად იბომბება, თითქმის ყოველდღე უტევენ დრონებით, რაკეტებითა და არტილერიით. რუსეთის კიდევ ერთ, კურსკის ოლქში აგვისტოდან გრძელდება სახმელეთო ბრძოლებიც. უკრაინას რუსეთზე დრონებით დღევანდელი მასირებული შეტევის და მისი სამიზნეების შესახებ ჯერჯერობით არაფერი უთქვამს. ასევე ნახეთ კიევზე დრონებით შეტევა იყო, ხარკოვი დაიბომბა დღეს დილით, ადგილობრივი დროით 06:00 საათიდან, მუშაობა დროებით შეწყვიტა რუსეთის თათრეთის რესპუბლიკის დედაქალაქ ყაზანის აეროპორტმა. რუსეთის საჰაერო ტრანსპორტის ფედერალურმა სააგენტომ კონკრეტული მიზეზი არ დაასახელა და ზოგადად განაცხადა, რომ გადაწყვეტილება მიღებულია უსაფრთხოების უზრუნველსაყოფად. დაახლოებით ორი საათის შემდეგ, თვითმფრინავების მიღება და გაშვება შეაჩერა თათრეთის რესპუბლიკის ქალაქ ნიჟნეკამსკის აეროპორტმაც. მსგავს ზომებს, როგორც წესი, დრონებით შეტევის საფრთხის გამო იღებენ. ...