ბაქოში მყოფმა რუსეთის საგარეო დაზვერვის სამსახურის დირექტორმა სერგეი ნარიშკინმა ჟურნალისტებთან საუბარში განაცხადა, რომ აშშ ცდილობს, გავლენა მოახდინოს საქართველოს საპარლამენტო არჩევნებზე, რომელიც 26 ოქტომბერს გაიმართება. ნარიშკინის თანახმად, ეუთოს დემოკრატიული ინსტიტუტებისა და ადამიანის უფლებების (ODIHR) ოფისმა "შეერთებული შტატების სახელმწიფო დეპარტამენტის თხოვნით მოამზადა შუალედური ანგარიში, რომელიც შეიცავს თეზისს, რომ საქართველოში, სავარაუდოდ, არ არსებობს სამართლიანი და ღია არჩევნების პირობები." ეს, "რა თქმა უნდა, არ შეესაბამება რეალობას", - ამბობს რუსეთის საგარეო დაზვერვის სამსახურის დირექტორი. "ამ ქმედების მიზანია, უხეშად, საკმაოდ თავხედურად ჩაერიოს საქართველოს შიდა საქმეებში, შეეცადოს, ხელი შეუშალოს ჯანსაღი, ეროვნულად ორიენტირებული ძალების ხელისუფლებაში კვლავ მოსვლას. მაგრამ დარწმუნებული ვარ, რომ საქართველოს ხალხი აირჩევს ... სწორ და ზუსტ არჩევანს გააკეთებს", - განაცხადა ნარიშკინმა. მან, ფაქტობრივად, გაიმეორა რუსეთის საგარეო დაზვერვის სამსახურის მიერ 11 სექტემბერს გავრცელებული განცხადების შინაარსი. ასევე ნახეთ რუსეთის საგარეო დაზვერვა: აშშ-ს სურს „ოცნების“ გამარჯვებაში ხელშეშლა ODIHR-ის დახმარებით მანამდე რუსეთის სპეცსამსახური აცხადებდა, რომ აშშ ემზადება „თბილისური მაიდნის“ მოწყობისთვის, რათა არ დაუშვას ოქტომბრის საპარლამენტო არჩევნებში „ქართული ოცნების“ გამარჯვება. ასევე ნახეთ კრემლის პროპაგანდისტები: აშშ საქართველოში "მაიდანს" ამზადებს, "აგენტებზე" კანონის საპასუხოდ ...