ძლიერი აფეთქებები იყო ლიბანის დედაქალაქ ბეირუთის სამხრეთ გარეუბანში, საერთაშორისო აეროპორტის რაიონში. 4 ოქტომბერს, შუაღამის შემდეგ, ისრაელის არმიამ მორიგი იერიში მიიტანა რადიკალური შიიტური ორგანიზაციის, ჰეზბოლას ობიექტებზე. სააგენტო AFP ჰეზბოლასთან დაახლოებულ წყაროებზე დაყრდნობით წერს, რომ ორგანიზაციის ინფრასტრუქტურაზე, სულ მცირე, 11 დარტყმა იყო. ისრაელის ოფიციალურმა წარმომადგენელმა ტელეკომპანია CNN-ს უთხრა, რომ ავიადარტყმების სამიზნე იყო ჰაშემ საფი ად-დინი, რომელიც არაბული მედიასაშუალებების ინფორმაციით, ჰეზბოლამ გენერალურ მდივნად აირჩია ორგანიზაციის ლიდერის, ჰასან ნასრალას მკვლელობის შემდეგ. გამოცემა The New York Times-ი ისრაელის სამ მაღალჩინოსანზე დაყრდნობით წერს, რომ ჰაშემ საფი ად-დინი ბეირუთის სამხრეთ გარეუბანში მდებარე ბუნკერში ესწრებოდა ჰეზბოლას ხელმძღვანელების შეხვედრას. გამოცემის წყაროთა თანახმად, ისრაელის არმიის სამიზნე სწორედ ეს ბუნკერი იყო. ოპერაციის შედეგების შესახებ ჯერჯერობით არაფერს იუწყებიან. ისრაელის არმიის სამხედროებმა ჰეზბოლას ლიდერი ჰასან ნასრალა 27 სექტემბერს ბეირუთში ავიადარტყმის შედეგად მოკლეს. ჰაშემ საფი ად-დინი ჰეზბოლას თანადამფუძნებელია და ნასრალას მკვლელობამდე აღმასრულებელი კომიტეტის თავმჯდომარე იყო. ის აშშ-ის მიერ ძებნილი ტერორისტების ნუსხაშია. 60 წლის ად-დინი ნასრალას დეიდაშვილია. ირანის მიერ მხარდაჭერილი ჰეზბოლა წარმოადგენს როგორც გასამხედროებულ ჯგუფს, ისე პოლიტიკურ პარტიას და ლიბანის სამხრეთში აკონტროლებს შიიტებით დასახლებული რაიონების დიდ ნაწილს. ჰეზბოლა ტერორისტულ ორგანიზაციად ჰყავს გამოცხადებული აშშ-ს. ევროკავშირი ასეთად აღიარებს მხოლოდ ორგანიზაციის სამხედრო ფრთას. ასევე ნახეთ რატომ შეიჭრა ისრაელი ლიბანში? ისრაელის თავდაცვის ძალებმა ლიბანში ჰეზბოლას წინააღმდეგ საჰაერო ოპერაცია სექტემბრის ბოლოდან დაიწყეს, 1 ოქტომბრიდან კი ლიბანის სამხრეთში სახმელეთო შეტევაზეც გადავიდნენ. ისრაელი აცხადებს, რომ ამ ოპერაციის მიზანია ჰეზბოლას თავდასხმებისგან ქვეყნის ჩრდილოეთის დაცვა. ლიბანის მთავრობის მონაცემებით, ისრაელის ავიადარტყმების შედეგად დაღუპულია 1300-ზე მეტი ადამიანი, დაახლოებით მილიონი კი იძულებული გახდა სახლები დაეტოვებინა. ისრაელის ხელისუფლება აცხადებს, რომ ებრძვის მხოლოდ ჰეზბოლას ტერორისტებს და არა ლიბანელ ხალხს, ამიტომ კონკრეტულ რაიონებზე დარტყმამდე ადგილობრივ მცხოვრებთ ევაკუაციისკენ მოუწოდებს. ახლო აღმოსავლეთში ვითარება უკიდურესად დაიძაბა 2023 წლის ოქტომბრიდან, როცა ისრაელმა პალესტინელთა რადიკალურ ისლამისტურ მოძრაობა ჰამასს ისრაელის ტერიტორიაზე თავდასხმის, ათასზე მეტი ადამიანის დახოცვისა და მძევლად აყვანის გამო ომი გამოუცხადა და ღაზის სექტორში დიდი მსხვერპლის და ჰუმანიტარული კატასტროფის გამომწვევი სამხედრო ო...