ომბუდსმენი გამოეხმაურა უცხოეთში მყოფი იმ დევნილების საკითხს, რომლებიც საკონსულო აღრიცხვის მიუხედავად, საარჩევნო სიაში არ შეჰყავთ. ისინი საქართველოს ოკუპირებულ ტერიტორიებზე არიან რეგისტრირებული, ფაქტობრივი მისამართი საქართველოს კონტროლირებად ტერიტორიაზე არ აქვთ, ამიტომ ერთიან საარჩევნო სიაში არ შეჰყავთ. საკითხის მოკვლევის შედეგად სახალხო დამცველს მიაჩნია, რომ რეგისტრაციის ტექნიკური საკითხი არ უნდა გახდეს ადამიანებისთვის კონსტიტუციით გარანტირებული, არჩევნებში მონაწილეობის უფლების შეზღუდვის საფუძველი, მით უმეტეს, როცა ეს არჩევნები არის საერთო-სახელმწიფოებრივი და არა ადგილობრივი თვითმმართველობის. ომბუდსმენი საქართველოს ცენტრალურ საარჩევნო კომისიას მოუწოდებს, "მისი დისკრეციული უფლებამოსილების ფარგლებში, ადამიანის უფლებების დაფუძნებული მიდგომის და ნორმათა სისტემური განმარტების საფუძველზე, გამოიყენოს მის ხელთ არსებული ყველა შესაძლებლობა და შეიყვანოს ასეთი პირების მონაცემები ერთიან საარჩევნო სიაში". ასევე ნახეთ მიიღებს თუ არა არჩევნებში მონაწილეობას უცხოეთში მცხოვრები დევნილების ნაწილი სადამკვირვებლო ორგანიზაციების კოალიცია „ჩემი ხმა“ გამოეხმაურა საზღვარგარეთ მყოფი დევნილებისთვის არჩევნებში მონაწილეობის უფლების განხორციელებასთან დაკავშირებულ პრობლემებს. როგორც კოალიციაში აცხადებენ, მიუხედავად იმისა, რომ საზღვარგარეთ მყოფმა საქართველოს მოქალაქეებმა საგარეო საქმეთა სამინისტროსა და ცესკოს ინსტრუქციების შესაბამისად გაიარეს საკონსულო აღრიცხვა, მათ ექმნებათ ადმინისტრაციული და ბიუროკრატიული ბარიერები და მაინც ვერ ხვდებიან ამომრჩეველთა ერთიან სიაში. ...