ისრაელის არმიის ცნობით, იერიში მიიტანეს მიწისქვეშა გვირაბზე, რომელიც ლიბანის საზღვრისპირა არეალიდან სირიაში იყო გაყვანილი. ამავე ინფორმაციით, გვირაბის საშუალებით შეიძლებოდა დიდი რაოდენობის იარაღის გადატანა და შენახვა. 4 ოქტომბრის ცნობით, რომელსაც Reuters-ი არმიის წარმომადგენელზე, ვიცე-პოლკოვნიკ ნადავ შოშანის მონაცემებზე დაყრდნობით ავრცელებს, ისრაელის არმიამ ლიბანში სახმელეთო ოპერაციის დაწყებიდან მოკლა ჰეზბოლას 250 მებრძოლი, მათ შორის სამხედროები სამეთაურო შემადგენლობიდან. ლიბანის სამხრეთში, ქალაქ მარჯაიუნზე ისრაელის არმიის საჰაერო თავდასხმის შედეგად მუშაობა შეაჩერა საავადმყოფომ. სააგენტო Reuters-ის თანახმად, რაკეტა საავადმყოფოს შესასვლელთან ჩამოვარდა და სამედიცინო პერსონალმა მოახერხა დროებითი ევაკუაცია. საავადმყოფოს დირექტორის, მუნეს კლაკეშის თანახმად, პერსონალიდან არავინ დაშავებულა. მან თქვა, რომ ევაკუაცია გადაწყვიტეს ვითარებიდან გამომდინარე, „სანამ უსაფრთხოების მდგომარეობა გაირკვევა“. ჰეზბოლა აშშ-ში ტერორისტულ დაჯგუფებადაა გამოცხადებული, ევროკავშირის ქვეყნებს კი მისი სამხედრო ფრთა ჰყავთ "შავ სიაში" შეყვანილი. ჰეზბოლას პოლიტიკური ფრთის წარმომადგენლები ლიბანის პარლამენტის წევრები არიან. ჰეზბოლა აკონტროლებს ლიბანის სამხრეთის დიდ ნაწილს. 4 ოქტომბერს, შუაღამის შემდეგ, ისრაელის არმიამ მორიგი იერიში მიიტანა ჰეზბოლას ობიექტებზე. სააგენტო AFP ჰეზბოლასთან დაახლოებულ წყაროებზე დაყრდნობით წერს, რომ ორგანიზაციის ინფრასტრუქტურაზე, სულ მცირე, 11 დარტყმა იყო. ასევე ნახეთ ისრაელის არმიამ ბეირუთში ჰეზბოლას სადაზვერვო შტაბზე იერიშის შესახებ განაცხადა ასევე ნახეთ რატომ შეიჭრა ისრაელი ლიბანში? ...