რუსეთის პრეზიდენტმა ვლადიმირ პუტინმა ქართული დიასპორის ხელმძღვანელი რუსეთში, დავით ცეცხლაძე, პრეზიდენტთან არსებული ერთაშორისი ურთიერთობების საბჭოს შემადგენლობაში შეიყვანა. შესაბამის ბრძანებაში ცვლილებას ხელი პუტინმა დღეს, 4 ოქტომბერს, მოაწერა. რუსეთის პრეზიდენტთან არსებული ერთაშორისი ურთიერთობების საბჭო 2012 წელს შეიქმნა. ცეცხლაძე კი რუსეთში ქართულ დიასპორას 2021 წლიდან ხელმძღვანელობს. რუსული მედიის თანახმად, ქართული დიასპორის წარმომადგენელი საბჭოში პირველად მოხვდა. რუსეთის პრეზიდენტის ვებსაიტზე საბჭოს შესახებ გამოქვეყნებული ინფორმაციით, ის შეიქმნა ეთნიკური ურთიერთობების სფეროში სახელმწიფო პოლიტიკის გაუმჯობესების მიზნით და არის რუსეთის პრეზიდენტს დაქვემდებარებული საკონსულტაციო ორგანო. საბჭოში შედიან ეროვნული კულტურული ავტონომიების წარმომადგენლები, სამეცნიერო და საექსპერტო საზოგადოების წარმომადგენლები, მინისტრები და დუმის დეპუტატები. საბჭოს წევრობა ნებაყოფლობითია. ქართული დიასპორის ხელმძღვანელი დავით ცეცხლაძე აქტიურად თანამშრომლობს რუსეთის ხელისუფლებასთან და ემხრობა რუსეთის ომს უკრაინაში. აგვისტოში ცეცხლაძემ კომენტარი გააკეთა კურსკის ოლქში უკრაინის შეიარაღებული ძალების შეტევით ოპერაციაში ქართველი მებრძოლების მონაწილეობაზე და ქართველ მებრძოლებს მოუწოდა, „დაყარონ იარაღი და თავიანთ ოჯახებს დაუბრუნდნენ“. დავით ცეცხლაძე რუსულ-ქართული ბიზნესსაბჭოს თავმჯდომარის მოადგილეა. მას ნათქვამი აქვს, რომ რუსეთ-საქართველოს ბიზნესსაბჭოს მონაწილეებმა „შეძლეს საქართველოს ხელისუფლებისთვის ხმის მიწვდენა“ და რომ "საქართველოს მთავრობა ისტერიკულ პოლიტიკას არ ეწევა“. ის დადებითად აფასებს საქართველო-ჩინეთის ურთიერთობებს. „ნებისმიერი ჯანსაღი ნაბიჯი, რომელიც არ უკავშირდება ანტირუსულ პროპაგანდას და რუსეთის წინააღმდეგ შეკვეთილ პოლიტიკას, ძალიან ადეკვატურად მიიღება“, - აცხადებდა ცეცხლაძე. დავით ცეცხლაძე იყო საქართველოსთან პირდაპირი საჰაერო მიმოსვლის აღდგენის თხოვნით რუსეთის პრეზიდენტისადმი 2021 წელს გაგზავნილი წერილის ავტორიც. ასევე ნახეთ ქართული დიასპორის ხელმძღვანელს რუსეთში საქართველოს პრემიერის მიწვევა სურს 2024 წლის 10 მაისს რუსეთის პრეზიდენტმა ვლადიმირ პუტინმა ხელი მოაწერა ბრძანებულებებს საქართველოსთან 2019 წლის ზაფხულიდან გაუქმებული პირდაპირი ავიამიმოსვლის აღდგენის და 2000 წლიდან მოქმედი სავიზო რეჟიმის გაუქმების შესახებ. ამის შემდეგ საქართველოს სამოქალაქო ავიაციის სააგენტომ რუსულ და ქართულ ავიაკომპანიებს რუსეთ-საქართველოს შორის პირდაპირი ფრენების დაწყების უფლება მისცა. ...