როგორც ცესკოს თავმჯდომარე გიორგი კალანდარიშვილმა გადაწყვეტილების შემდეგ განაცხადა, საზღვარგარეთ მყოფმა ამომრჩევლებმა, რომელთა რეგისტრაციის მისამართი ოკუპირებულ ტერიტორიაზეა ან გაურკვეველია, რეგისტრაცია, არჩევნებში მონაწილეობის მიზნით, 7 ოქტომბრის ჩათვლით უნდა გაიარონ. რადიო თავისუფლება რამდენიმე დღის წინ წერდა, რომ უცხოეთში მცხოვრებ დევნილებს, რომლებსაც რეგისტრაციის ადგილად საქართველოს ოკუპირებული ტერიტორიები აქვთ მითითებული და ფაქტობრივი მისამართი საქართველოს კონტროლირებად ტერიტორიაზე არ უფიქსირდებათ, არჩევნებში მონაწილეობის პრობლემა შეექმნათ. მათაც ცოტა ხნის წინ შეიტყვეს, რომ საკონსულო აღრიცხვაზე დადგომის მიუხედავად, ამომრჩეველთა სიაში ვერ მოხვდნენ. ასევე ნახეთ მიიღებს თუ არა არჩევნებში მონაწილეობას უცხოეთში მცხოვრები დევნილების ნაწილი 5 ოქტომბერს, ცესკოს სხდომაზე ეს საკითხი განიხილეს. საკითხი ოპოზიციამ წამოჭრა და წარადგინა შესაბამისი დადგენილების პროექტი. ცესკომ გამართულ სხდომაზე გადაწყვეტილება ერთხმად მიიღო და დადგენილებას მხარი დაუჭირა. ეს გადაწყვეტილება არ ნიშნავს ახალი უბნების გახსნას. ეს ნიშნავს, რომ დევნილები, რომელთაც მისამართი ოკუპირებულ ტერიტორიებზე აქვთ და ცხოვრობენ ამა თუ იმ ქვეყანაში, ხმის მიცემას მოახერხებენ ამ ქვეყნის იმ ქალაქში, სადაც დიპლომატიური წარმომადგენლობა არსებობს და სადაც გახსნილი იქნება საარჩევნო უბანი. ცესკოს თავმჯდომარე გიორგი კალანდარიშვილმა კენჭისყრამდე განაცხადა, რომ უერთდება კოლეგების მოწოდებას ამ თემაზე: „რა თქმა უნდა, ძალიან მნიშვნელოვანი იქნება, რომ ამ საკითხთან დაკავშირებით იყოს ერთსულოვნება“. მისი თქმით, ეს გადაწყვეტილება ასობით ადამიანს მისცემს არჩევნებში მონაწილეობის შესაძლებლობას. გადაწყვეტილებას გამოეხმაურა თამარ კორძაია, „ერთიანობა - ნაციონალური მოძრაობის“ ერთ-ერთი ლიდერი. „ეს არის ჩვენი პირველი წარმატება. ბრძოლას ყოველთვის აქვს აზრი და დარწმუნებული იყავით, რომ ჩვენ, „ერთიანობა - ნაციონალური მოძრაობა“, ბოლომდე ვიბრძოლებთ თითოეული ხმის დასაცავად“, - განაცხადა მან. ცესკოს ამავე სხდომაზე, სხდომის დასაწყისში, ხმაური მოჰყვა „ნაციონალური მოძრაობის“ წარმომადგენლის, დავით კირთაძის სიტყვით გამოსვლას. კირთაძემ სიტყვით გამოსვლა დაიწყო ევროსაბჭოს საპარლამენტო ასამბლეის (PACE) 24 წევრის საპარლამენტო არჩევნებთან დაკავშირებით ერთობლივი განცხადებიდან ამონარიდის წაკითხვით: „ბატონო თავმჯდომარევ, წეღან არ მომეცით სიტყვის თქმის საშუალება, უბრალოდ გეტყვით, მინდა კარგად მომისმინოთ: „საბოლოოდ, როგორც ჩანს, ცენტრალური საარჩევნო კომისია ცოტა ხნის წინ მმართველი პარტიის კონტროლის ქვეშ მოექცა… ეს არის ევროსაბჭოს ასამბლეის დეკლარაცია, რომელიც“... ასევე ნახეთ "საქართველოდან საგანგაშო ცნობები მოდის" ...