43
„მედიის ადვოკატირების კოალიცია“ გმობს „ქართული ოცნების“ მიერ „უკრაინელი ხალხის ტრაგედიის პოლიტიკური მიზნებისთვის ბოროტად გამოყენებას“. 5 ოქტომბერს გამოქვეყნებულ განცხადებაში კოალიცია წერს, რომ ტელეარხების, „მთავარი არხის“, „ტვ პირველისა“ და „ტელეკომპანია ფორმულის“ მიმართ „ქართული ოცნების“ პოლიტიკური რეკლამის გავრცელების მოთხოვნა არა მხოლოდ მედიის თავისუფლების, არამედ ეთიკური ჟურნალისტიკის უხეში დარღვევაა. „მმართველი პარტიის პროპაგანდა, რომელიც უკრაინელი ხალხის ღირსების შემლახველია, მედიაში კრიტიკული ხმების ჩახშობის მორიგი მცდელობაა“, - აცხადებს კოალიცია. რამდენიმე საათით ადრე სამმა ტელეკომპანიამ განაცხადა, რომ „ქართული ოცნება“ მათგან ითხოვს უკრაინის ომის ამსახველი „ამორალური“ ბანერების მათ ეთერში გაშვებას, რაზეც, დაჯარიმების რისკის მიუხედავად, უარს აცხადებენ. „მძიმე ჯარიმების საფრთხე არის საგანგაშო ტაქტიკა, რომელიც გამოიყენება მედია საშუალებების იძულების მიზნით, დაემორჩილონ და გაავრცელონ ნარატივი, რომელიც ფუნდამენტურად ეწინააღმდეგება დემოკრატიისა და ადამიანის უფლებების ღირებულებებს“, - მიიჩნევს „მედიის ადვოკატირების კოალიცია“. კოალიცია სოლიდარობას უცხადებს დამოუკიდებელ მედიასაშუალებებს და წერს: „მედიებზე განხორციელებული მძიმე ზეწოლა ასახავს საქართველოში მზარდი ავტორიტარიზმისა და დემოკრატიული ღირებულებების უგულებელყოფის შემაშფოთებელ ტენდენციას. კოალიცია იზიარებს საქართველოში ევროკავშირის ელჩის შეფასებაში გამოთქმულ განწყობას და ვგმობთ ამ კამპანიას, როგორც „აღმაშფოთებელს, სამარცხვინოს და შემზარავს“. ასევე ნახეთ „უარს ვამბობთ „ოცნების“ ამორალური ბანერების ეთერში გაშვებაზე, გვემუქრება ჯარიმები“ - სამი ტელეარხი თბილისში 26 სექტემბერს გამოჩნდა პარტია „ქართული ოცნების“ საარჩევნო ბანერები წარწერით: „არა ომს, აირჩიე მშვიდობა“. უკრაინის საგარეო საქმეთა სამინისტრო ოფიციალური განცხადებით გამოეხმაურა „ოცნების“ წინასაარჩევნო ბანერებს და მოუწოდა საქართველოს მთავრობასა და ყველა დაინტერესებულ მხარეს, თავი შეიკავონ უკრაინისა და მისი მოქალაქეების წინააღმდეგ აგრესიული ომის თემატიკის შიდაპოლიტიკურ ბრძოლაში გამოყენებისაგან. ...
