„ურზულან [ფონ დერ ლაენმა] თქვა, რომ მე არჩევნების მერე, - თუკი საქართველომ დაადასტურა თავისი ნება, - მე უთუოდ ჩამოვალო. ასევე მაკრონმა“, - თქვა პრეზიდენტმა ზურაბიშვილმა ტელეკომპანია „პირველის“ ჟურნალისტ ნოდარ მელაძესთან ინტერვიუში. ამჟამად ევროკავშირს, დემოკრატიული უკუსვლის გამო, შეჩერებული აქვს საქართველოსთან უმაღლესი რანგის ურთიერთობები და ევროინტეგრაციის პროცესი. პრეზიდენტი ასევე განმარტავს მისი ევროპაში ვიზიტის მიზანს: „როცა მოსახლეობა [არჩევნებზე] თავისას იტყვის, - რაც ადრე ქუჩაში თქვა და რასაც ახლა დაადასტურებს, - მინდოდა გამეგო მათგან [ევროპელი ლიდერებისგან] და პირობა მიმეღო, რომ ჩქარა დაგვაბრუნებენ იმ გზაზე, საიდანაც მოგვგლიჯა „ოცნებამ““, - თქვა პრეზიდენტმა. სალომე ზურაბიშვილმა თქვა, რომ ევროკავშირში გაწევრების შესაძლებლობის ფანჯარა, - „რისთვისაც უნდა ვუმადლოდეთ უკრაინას - კვლავ გახსნილია“ და ელოდება ქართველი ხალხის გადაწყვეტილებას. „ეს გზა შეჩერებულია, მაგრამ კვლავ არის და გველოდება, ელოდება ქართველი ხალხის ნებას“, - თქვა მან. სალომე ზურაბიშვილის თქმით, 2025 წლის ივნისში შეიკრიბება ევროპული საბჭო, რომელიც ამ საკითხზე იმსჯელებს. ასევე ნახეთ „იზოლაცია საშინელი კოშმარია“ - პრეზიდენტის მორიგი „უნებართვო“ ტურნე ევროპაში ...