ისრაელის საჰაერო ძალებმა 6 ოქტომბერს მასიური საჰაერო თავდასხმები მოაწყვეს ლიბანის დედაქალაქ ბეირუთის სამხრეთ გარეუბანზე იმ დროს, როცა ქვეყანა ასევე განიხილავს ირანის ბოლოდროინდელ სარაკეტო თავდასხმაზე პასუხის ვარიანტებს. ისრაელმა განაცხადა, რომ მან განახორციელა "მიზანმიმართული დარტყმების" სერია "იარაღის საწყობებზე" და ინფრასტრუქტურულ ობიექტებზე , რომლებიც ეკუთვნის ჰეზბოლას. ჰეზბოლა ტერორისტულ დაჯგუფებადაა შერაცხილი შეერთებული შტატების მიერ, ხოლო ევროპის კავშირმა შავ სიაში შეიყვანა მისი შეიარაღებული ფრთა, მაგრამ არა მისი პოლიტიკური ნაწილი, რომელსაც ადგილები აქვს ლიბანის პარლამენტში. ლიბანის ოფიციალურმა საინფორმაციო სააგენტომ განაცხადა, რომ ჰეზბოლას დასაყრდენ პუნქტს ამ არეალში 30-ზე მეტჯერ დაარტყეს. საჰაერო თავდასხმები განხორციელდა ბენზინგასამართ სადგურსა და სამედიცინო ინვენტარის საწყობზე. ვიდეოჩანაწერში ჩანს ღამის ცისკენ მიმავალი ცეცხლის ალი და კვამლი, როცა იქ მცხოვრები, პანიკით მოცული მოსახლეობა თავიანთი სახლებიდან გარბის აფეთქებების ხმის ფონზე. კვირას ისრაელის შეიარაღებული ძალების არაბულენოვანმა წარმომადგენელმა გამოაქვეყნა საევაკუაციო განგაშის ახალი გაფრთხილებები ლიბანის სამხრეთში მდებარე დაახლოებით 25 რაიონის მცხოვრებლებისთვის და მოუწოდა მათ, რომ დაუყოვნებლივ გაემართონ მდინარე ავალის ჩრდილოეთით. ისრაელი ბეირუთის შემოგარენს დღეების განმავლობაში ბომბავდა, რის შედეგადაც დაიღუპა ჰეზბოლას ლიდერი საიედ ჰასან ნასრალა და სავარაუდოდ, მისი პოტენციური შემცვლელი, ჰაშემ საფიედინი. ისრაელის პრემიერის, ბენიამინ ნეთანიაჰუს კანცელარიამ გაავრცელა ცნობა, რომ მან 6 ოქტომბერს მოინახულა ჯარები ლიბანის საზღვართან ერთი კვირის შემდეგ მას მერე, რაც ისრაელის არმიამ სახმელეთო ოპერაცია დაიწყო ლიბანის სამხრეთში ჰეზბოლას წინააღმდეგ. ასევე ნახეთ ვის ზღვის პირას სძინავს, ვის მანქანებში: ლიბანელები თავს ვერსად აფარებენ ისრაელის გამანადგურებელი დარტყმებისგან ...