ჰამასის (აშშ-სა და ევროკავშირში ტერორისტულად აღიარებული დაჯგუფება) ისრაელზე თავდასხმის და ისრაელის მიერ ღაზაში ომის დაწყების წლისთავის წინა დღეს, მასობრივი დემონსტრაციები იმართება მსოფლიოს სხვადასხვა ქვეყანაში. პალესტინელთა მიმართ სოლიდარობის შეკრებების მთავარი სლოგანია ღაზის სექტორში ცეცხლის დაუყოვნებლივ შეწყვეტა. ამ დემონსტრაციების მონაწილეები ისრაელს ღაზაში მშვიდობიანი მოსახლეობის მკვლელობაში ადანაშაულებენ. 6 ოქტომბრის გამოსვლები მოჰყვა დიდ თავყრილობებს, რომლებიც წინა დღეს გაიმართა ევროპის რამდენიმე ქალაქში, მათ შორის ლონდონში, ბერლინში, პარიზსა და რომში. პალესტინელების, ასევე ისრაელის მომხრეთა დემონსტრაციები მოსალოდნელია 7 ოქტომბერს. ბერლინში, ბრანდენბურგის ჭიშკართან მსვლელობისას, ისრაელის ასობით მომხრე პოლიციის ესკორტის თანხლებით გაემართა Unter den Linden-ისკენ პლაკატით: "ყველანაირი ანტისემიტიზმის წინააღმდეგ". ისრაელის მომხრეთა ხალხმრავალი დემონსტრაცია მოეწყო ბავარიაში, მიუნხენში. ბერლინში ასევე გაიმართა პალესტინელთა მომხრეების დემონსტრაცია და მსვლელობა სახელწოდებით: “დემონსტრაცია ღაზაში გენოციდის წინააღმდეგ”. პოლიციის თანახმად, ბერლინის კროიცბერგის უბანში გამართულ შეხვედრას, რომელიც არეულობაში გადაიზარდა, 3 500 ადამიანი ესწრებოდა. პოლიციამ დააკავა არაერთი დემონსტრანტი. დაღუპულთა ხსოვნისთვის პატივის მისაგებად და მათ მხარდასაჭერად, ვინც კვლავ ტყვეობაშია, ათასობით ადამიანი შეიკრიბა პარიზში ხელოვანების მონაწილეობით გამართულ მემორიალურ შეხვედრაზე. ლონდონში, ჰაიდ-პარკში, ათასობით ადამიანმა მოიყარა თავი ანალოგიურ მემორიალურ ღონისძიებაზე. შეკრებილები ერთხმად გაიძახოდნენ: "დააბრუნეთ ისინი სახლში" და აფრიალებდნენ ისრაელის დროშებს და პლაკატებს იმ მძევლების პორტრეტებით, რომლებიც კვლავ ჰამასის ტყვეობაში არიან. 6 ოქტომბერს ავსტრალიაში ათასობით ადამიანი შეიკრიბა პალესტინისა და ლიბანის მხარდასაჭერად. პალესტინის მომხრეთა შეკრება გაიმართა აგრეთვე მელბურნშიც. მელბურნში ისრაელის მომხრეებს ეჭირათ პლაკატები, რომლებზეც გამოსახული იყვნენ ისრაელელი მძევლები, რომლებიც უგზო-უკვლოდ დაკარგულად ითვლებიან. უშიშროების სამსახურები რამდენიმე ქვეყანაში გამოთქვამენ გაფრთხილებას, რომ მზარდმა კონფლიქტმა ახლო აღმოსავლეთში შეიძლება გამოიწვიოს ახალი ტერორისტული თავდასხმები ევროპაში ან ზოგიერთი საპროტესტო გამოსვლა შეიძლება ძალადობაში გადაიზარდოს. 6 ოქტომბერს იტალიის პრემიერ-მინისტრმა ჯორჯა მელონიმ თავისი "სრული სოლიდარობა" გამოხატა პოლიციისადმი ერთ დღეში მას შემდეგ, რაც უშიშროების ძალებმა ცრემლსადენი გაზი და წყლის ჭავლი გამოიყენეს მოძალადე დემონსტრანტების დასაშლელად რომში. მელონიმ მკაცრად დაგმო შეტაკებები პალესტინის რამდენიმე მომხრე დემონსტრანტსა და სამართალდა...