უკრაინაში ომის დაწყების შემდეგ შემცირებულია რიცხვი მსოფლიოს სახელმწიფოთა მეთაურების, რომლებიც რუსეთის პრეზიდენტ ვლადიმირ პუტინს დაბადების დღეს ულოცავენ. პუტინს 72 წელი 7 ოქტომბერს შეუსრულდა. დამოუკიდებელი გამოცემა „აგენტსტვო“ კრემლის პრესსამსახურის და რუსეთის სახელმწიფო სააგენტო „ტასის“ მიერ გამოქვეყნებული ცნობების საფუძველზე წერს, რომ 2024 წელს პუტინს დაბადების დღე მიულოცა 8 ქვეყნის ლიდერმა - ნიკარაგუის, ბელარუსის, თურქეთის, თურქმენეთის, ყაზახეთისა და ცენტრალური აფრიკის რესპუბლიკის პრეზიდენტებმა, სომხეთის პრემიერ-მინისტრმა და ბაჰრეინის მეფემ. ჩამონათვალში აღარ არის აზერბაიჯანის პრეზიდენტი ილჰამ ალიევი, რომელიც 2022 და 2023 წლებში იყო იმ ლიდერებს შორის, რომლებმაც პუტინს დაბადების დღე მიულოცეს. „აგენტსტვოს“ ინფორმაციით, უკრაინაში ომის დაწყების პირველ, 2022 წელს, პუტინს დაბადების დღე მიულოცა 14 სახელმწიფოს მეთაურმა, 2023 წელს კი - 10-ის. მათ შორის მხოლოდ 2022 წელს - ჩინეთის მეთაურმა სი ძინპინმა. ასევე ნახეთ „პროექტის“ გამოძიება: სოჭში დაანგრიეს პუტინის რეზიდენციის მთავარი შენობა, პრეზიდენტი იქ ჩასვლას ერიდება რუსეთის არმია უკრაინის ტერიტორიაზე 2022 წლის 24 თებერვალს შეიჭრა. პრეზიდენტმა პუტინმა "სპეციალური სამხედრო ოპერაციის" მიზნად გამოაცხადა უკრაინის "დემილიტარიზაცია და დენაციფიკაცია". უკრაინაში რუსული არმიის ფართომასშტაბიან შეჭრას წინ უძღოდა პუტინის მიერ უკრაინის ორი სეპარატისტული რეგიონის, დონეცკის და ლუგანსკის ე.წ. სახალხო რესპუბლიკების, "დამოუკიდებლობის" აღიარება. მანამდე, რუსეთმა მოითხოვა, რომ უკრაინა არ გახდეს ნატოს წევრი. 2022 წლის 30 სექტემბერს, რუსეთმა თავის ტერიტორიებად გამოაცხადა უკრაინის ხერსონის, ზაპოროჟიეს, დონეცკისა და ლუგანსკის ოლქები, თუმცა სრულად ვერცერთ მათგანს ვერ აკონტროლებს. 2014 წლიდან რუსეთის მიერ ანექსირებულია უკრაინის ყირიმის ნახევარკუნძული და ქალაქი სევასტოპოლი. უკრაინას მიზნად გამოცხადებული აქვს ტერიტორიული მთლიანობის სრულად აღდგენა. ...